L-Assistent Kummissarju Ian Abdilla żvela kif mill-apparat li l-Pulizja ħadet lil Yorgen Fenech inbdew 11-il investigazzjoni.
Huwa irrimarka dan hekk kif quddiem l-Imħallfin Michael Mallia, Joseph Said Pullicino u Abigail Lofaro kompliet tinstema l-inkjesta pubblika b’rabta mal-qtil ta’ Daphne Caruana Galizia li seħħ fis-17 ta’ Ottubru 2017.
Sa ftit taż-żmien ilu Abdilla kien imexxi t-Taqsima Kontra r-Reati Ekonomiċi imma wara li nħatar bħala Kummissarju Angelo Gafa t-taqsima għaddiet f’idejn l-Assistent Kummissarju Alexandra Mamo.
Meta mistoqsi jaħsibx li kien hemm relazzjoni bejn il-Panama papers u l-qtil, Abdilla sostna li għandu t-teoriji tiegħu dwar għala nqatlet Daphne Caruana Galizia imma mhu lest jitkellem dwarhom fil-miftuħ.
L-Assistent Kummissarju semma wkoll li kieku Konrad Mizzi u Keith Schembri kienu mistoqsijin dwar l-istrutturi fil-Panama u iddikjarawhom ma jfissirx li huma illegali fihom innifishom.
L-inkjesta pubblika ġiet aġġornata għall-Ġimgħa li ġejja fejn mistenni li jkompli jixhed l-istess uffiċjal tal-Pulizija.
