Jennifer Hermoso issejħet lura fit-team nazzjonali Spanjol għall-ewwel darba wara s-saga tal-famuża bewsa (mhux konsenswali) li rċeviet mingħand l-eks president tal-FA Spanjola (RFEF), Luis Rubiales.
L-inċident seħħ fl-20 ta’ Awwissu wara r-rebħa ta’ Spanja ta’ 1-0 kontra l-Ingilterra fil-finali tat-Tazza tad-Dinja tan-Nisa li saret f’Sydney, l-Awstralja.
Ħamest ijiem wara li rriżenja minn president minħabba l-pressjoni li saret fuqu, Luis Rubiales kellu jitressaq il-Qorti fuq akkużi ta’ attakk sesswali minħabba li bies bil-forza lil Hermoso.
Filmat miċ-ċerimonja tal-preżentazzjoni tal-midalji tat-Tazza tad-Dinja wera lil Rubiales iħaddan lil Hermoso, imbagħad poġġa iż-żewġ idejn fuq rasha qabel ta bewsa bil-forza. Imbagħad taptap idu fuq dahrha.
Wara dan l-inċident li attira l-attenzjoni kollha tad-dinja sportiva kif ukoll tappan ir-rebħ tat-Tazza tad-Dinja għall-Ispanjoli, Hermoso talbet biex tiġi rispettata l-privatezza tagħha u tal-familja fejn kienet qalet li riedet ftit żmien biex tirkupra.
Issa ġiet imsejħa għal-logħbiet internazzjonali kontra l-Italja, fis-27 ta’ dan ix-xahar u kontra l-Isvizzera, fil-31 ta’ Ottubru.
.
