Meta ntlagħbu l-ewwel żewġ kwarti-finali tal-UEFA Champions League, Arsenal jinsabu b’vantaġġ tajjeb meta għelbu lil Real Madrid bl-iskor ta’ 3-0 filwaqt li barra minn darhom Inter għelbu lil Bayern Munich 2-1.
Arsenal ……………..3
Real Madrid ……….0
Arsenal ospitaw lil Real Madrid u meritatament għelbuhom bl-iskor ta’ 3-0.
Wara kwarta logħob, Arsenal appellaw għal penalty meta x-xutt ta’ Gabriel Martinelli ħabat ma’ id Raul Asencio … iżda l-VAR iġġudika li l-player ta’ Real Madrid kien metru biss ‘il bogħod mill-eżekuzzjoni ta’ Martinelli.
Lejn tmiem l-ewwel taqsima, il-goalkeeper Thibaut Courtois kien providenzjali għal Real b’saves kbar fuq Martinelli.
Iżda l-istess Courtois ma seta’ jagħmel xejn meta ġie megħlub minn żewġ free-kicks brillanti ta’ Declan Rice (68, 70).
Imbagħad fil-75 minuta, Mikel Merino ta d-daqqa mortali lil Real Madrid b’xutt fir-rokna tax-xibka.
Bayern Munich …1
Inter ………………2
Barra minn darhom, Inter għelbu lil Bayern Munich bl-iskor ta’ 2-1.
Bayern setgħu fetħu vantaġġ ta’ żewġ goals iżda Harry Kane falla żewġ ċansijiet ta’ skor meta, fis-17-il minuta, minn pożizzjoni ideali d-daqqa ta’ ras tiegħu kienet wisq ċentrali u fil-31 minuta seta’ għamel aħjar u laqat il-lasta.
U għal dawn in-nuqqasijiet, fl-uniku attakk, Inter fetħu l-iskor minn Lautaro Martinez (38) wara li rċieva mingħand Marcus Thuram.
Fil-85 minuta, Thomas Muller kiseb id-draw għall-Bavarjani iżda Inter għamlu reazzjoni u tliet minuti wara Davide Frattesi skorja l-goal tar-rebħa.
