Splużjoni ta’ bomba f’nightclub fil-Perù darbet 33 persuna, inklużi żgħażagħ taħt it-18-il sena. L-isplużjoni seħħet fis-sigħat bikrin ta’ filgħodu fin-nightclub Dalí fil-provinċja ta’ Trujillo fit-tramuntana tal-Perù.
Trujillo huwa reġjun li dan l-aħħar kien mifni bil-vjolenza u l-kriminalità. Ma kienx immedjatament magħruf la min kien responsabbli għal dan l-att vjolenti u lanqas il-motiv wara l-isplużżjoni.
Mill-inqas ħamsa mill-persuni midruba kienu f’kundizzjoni serja, skont id-direttur eżekuttiv tan-Netwerk tas-Saħħa ta’ Trujillo.
Uħud mill-vittmi sofrew amputazzjonijiet u feriti minn shrapnel tant li kellhom jiġu operati b’urġenza għall-feriti gravi li sofrew. Ingħad li fost il-midrubin kien hemm żgħażagħ ta’ 16 u 17-il sena.
L-isplużjoni seħħet inqas minn xahar wara splużjoni oħra fl-istess belt li għamlet ħsara lil 25 dar iżda ma kkawżat l-ebda korriment jew imwiet.
L-estorsjoni u t-tħaffir illegali jolqtu r-reġjun ta’ La Libertad, li l-parti Andina tiegħu hija l-bażi tal-akbar żona li tipproduċi d-deheb fil-Perù. Fl-2025, ir-reġjun esperjenza 286 splużjoni, li 136 minnhom seħħew fil-belt ta’ Trujillo, skont ċifri uffiċjali.
L-espansjoni ta’ gruppi kriminali organizzati wasslet għal żieda fir-reati relatati bħall-estorsjoni.