Jason Zammit ta’ 47 sena minn Tal-Pietà nżamm arrestat wara li dalgħodu tressaq il-qorti quddiem il-Maġistrat Noel Bartolo mixli b’pussess aggravat ta’ droga kokaina u eroina.
Minkejja li saret it-talba għall-ħelsien mill-arrest, Il-Qorti ċaħdet din it-talba għall-fatt li għad hemm diversi persuni li għad iridu jagħtu ix-xhieda tagħhom dwar il-każ.
Il-Prosekuzzjoni tmexxiet mill-Ispettur Jonathan Pace filwaqt li l-Avukat Matthew Xuereb deher għall-akkużat.
10:30 a.m: Arrestat b’rabta ma’ pussess aggravat ta’ droga
Raġel ta’ 47 sena residenti l-Pietà, kien arrestat b’rabta ma’ pussess aggravat tad-droga kokaina u eroina.
Mill-investigazzjonijiet illi saru rriżulta li r-raġel, allegatament kien jipprepara d-droga f’residenza f’Tal-Pietà. Minn tfittxija li saret fil-post instabu diversi affarijiet relatati mal-allegat ipproċessar tad-droga u madwar €30,000 fi flus kontanti.
Fl-istess residenza nstabu wkoll madwar 100g droga allegatament kokaina, madwar 60g droga allegatament eroina u 500ml methadone.
Ir-raġel qiegħed jinżamm arrestat fil-lockup tal-Pulizija fil-Kwartieri Ġenerali, il-Floriana u mistenni jitressaq il-Qorti għall-ħabta tal-11:30 a.m quddiem il-Maġistrat tal-Għassa Dr Noel Bartolo.
