Il-persuni responsabbli mit-tkissir ta’ qsari quddiem ristorant fis-Siġġiewi ġew identifikati, ammettew u saħansitra ġie maqbul li jpoġġu qsari ġodda li ħadmu huma stess.
F’aġġornament b’rabta mal-każ, Marilù’s qalet li l-appoġġ li sabu huwa indeskrivibbli u li biex kemm jista’ jkun din is-sitwazzjoni jinħareġ l-at pożittiv minnha qalu li mhumiex se jfittxu lil dawk responsabbli ladarba l-ħwat li kienu jsebbħu l-pjazza rritornaw.
Qalet ukoll li s-sewwieq u sħabu stess ħadmu l-ħwat fil-garaxx tagħhom minħabba li mhux faċli biex takkwista ħwat simili għal dawk minħabba li huma antiki.
Ir-ristorant irringrazzja lil dawk kollha li avviċinawhom minnufih, inkluż uffiċjali mill-Pulizija tal-Komunità, oħrajn pajżana u saħansitra nies fil-viċin li offrew li jagħtu filmati mis-CCTVs tagħhom.
Ilbieraħ: Jinqabdu jidħku huma u jkissru qsari quddiem ħanut fis-Siġġiewi
Sewwieq ta’ vann li miegħu kellu rekbin xi persuni oħra nqabdu permezz ta’ filmat minn CCTV isuqu fuq dekorazzjonijiet li kellu ħanut fis-Siġġiewi.
Fil-filmat, il-vann deher isuq fit-triq, meta f’ħin minnhom irriversja u għadda minn fuq il-qsari li kienu qegħdin iservu biex isebbħu l-estetika barra mill-istess ħanut.
Is-sidien tal-ħanut Marilù’s qalu fuq Facebook li dawn il-qsari għamluhom propju sabiex isebbħu Pjazza San Nikola u li dan l-inċident jimlihom b’ċertu dieqa. Filwaqt li kkonfermaw li kienu se jagħmlu rapport lill-Pulizija, huma ħeġġew lil pubbliku sabiex kull min għandu informazzjoni jgħaddiha anke b’mod kunfidenzjali lill-Pulizija.
