Ġurnalista li taħdem għall-istazzjon tal-aħbarijiet Radio Liberty fl-Ukrajna, inqatlet waqt il-bumbardament li seħħ ilbieraħ fi Kyiv.
Vera Gyrych kienet tinsab għal kwiet id-dar, meta missila laqtet id-dar tagħha, skont stqarrija li ngħatat minn Radio Liberty.
Uħud mill-kollegi tal-vittma esprimew is-sogħba tagħhom għal din l-aħbar kerha fuq il-midja soċjali, fejn iddeskrivew lil Gyrych bħala persuna b’qalb tajba u professjonali ħafna f’xogħolha.
Iktar kmieni dalgħodu, is-Sindku ta’ Kyiv, Vitali Klitschko, ħabbar li nstab katavru ta’ persuna li tilfet ħajjitha fl-attakk li seħħ ilbieraħ fi Kyiv, però dak il-ħin ma tax dettalji dwar l-identità tal-vittma.
IKTAR KMIENI LLUM: Persuna tilfet ħajjitha fl-attakk li seħħ ilbieraħ fi Kyiv
Persuna tilfet ħajjitha fl-attakk li seħħ ilbieraħ fi Kyiv. Dan ħabbru s-Sindku ta’ Kyiv, Vitali Klitschko.
Klitschko qal li l-katavru nstab waqt li l-ekwipaġġ tas-salvataġġ kienu għaddejjin bi tfittxija f’wieħed mill-bini li ntlaqat minn rocket fid-distrett ta’ Shevchenkivskyi.
L-attakk fi Kyiv seħħ waqt li kien hemm is-Segretarju Ġenerali tan-Nazzjonijiet Magħquda, Antonio Guterres, fil-kapitali tal-Ukrajna, li kien jinsab fuq żjara sabiex jiltaqa’ mal-President Ukren Volodymyr Zelensky.
Huwa rrappurtat li Zelensky qies dan l-attakk bħala umiljazzjoni mir-Russja fil-konfront tan-Nazzjonijiet Magħquda.
