Sorsi qrib Talk.mt ikkonfermaw magħna li l-ħidma li ħadet numru ta’ sigħat, ġiet fi tmiemha b’suċċess grazzi għal ħidma kollaborattiva bejn l-uffiċjali kollha involuti.
Id-dħaħen għadhom jinfirxu u l-irwejjaħ għadhom jippersistu f’xi żoni, iżda jidher li n-nirien mifruxin f’diversi lokalitajiet huma kollha kontrollati.
Bħala miżura ta’ prekawzjoni jidher li xi uffiċjali baqgħu għal xi ħin għassa f’każ li jkun hemm xi sinjali li juru mod ieħor, iżda kollox qiegħed jindika li l-operazzjoni ntemmet b’suċċess.
6:00 p.m: Bdiewa mħassbin dwar it-telf tal-prodotti li ilhom jkabbru diversi xhur
L-uffiċjali komplew b’ħidma ma taqta’ xejn fiż-żoni li fihom infirxu n-nirien. Għadd ta’ uffiċjali u vetturi komplew jaslu biex jassistu lil dawk li intervjenew qabilhom hekk kif din il-ħidma hu stmat li se tinvolvi sforz kollettiv u eluf ta’ litri ta’ ilma trasportat b’diversi vetturi mid-Dipartiment.
Bdiewa li tkellmu ma’ dan is-sit qalulna li jinsabu mħassbin dwar dak kollu li ilhom jaħdmu għalih f’dawn l-aħħar xhur fosthom siġar li kabbru huma stess u prodotti agrikoli oħrajn li kellhom miżrugħin. Madanakollu huma qalu li l-ħidma tal-pumpiera hija ferm aktar importanti f’dawn il-mumenti.
Kif jixhdu ritratti meħudin mill-fotografu ta’ Talk.mt, dawn l-uffiċjali b’esperjenza liema bħala jidħlu fin-nirien biex joffru sigurtà lill-pubbliku.
Il-ħidma tkompli…
5:00 p.m: Jintervjenu wkoll il-Pulizija… inħawi kontrollati… tkompli l-ħidma f’inħawi oħrajn
Minħabba l-firxa tan-nirien kellhom jintervjenu wkoll uffiċjali mill-għases tad-distretti rispettivi.
Fuq nota aktar pożittiva kif jixhdu ritratti meħudin minn dan is-sit juru li l-pumpiera rnexxielhom jikkontrollaw in-nirien f’xi inħawi anke jekk il-ħidma jidher li mistennija tieħu aktar ħin.
Għalkemm ġew innutati xi ambulanzi minn tad-Direttorat tal-Ħarsien tal-annimali, s’issa mhux magħruf jekk kienx hemm xi annimali li kellhom jiġu assistiti minħabba n-nirien u d-dħaħen li komplew jinfirxu.
4:30 p.m: In-nirien jinfirxu f’diversi lokalitajiet… Għadd ta’ uffiċjali involuti
Dan is-sit jinsab infurmat li anke minħabba l-element tar-riħ li kompla jxekkel il-ħidma tal-pumpiera, l-għadd ta’ uffiċjali li ntalbu jintervejnu żdied b’mod konsiderevoli.
Jidher li minbarra għadd ta’ pumpiera kif ukoll vetturi tat-tifi tan-nar, ġew imsejħa numru ta’ uffiċjali minn Transport Malta hekk kif in-nirien u d-dħaħen komplew jiksu partijiet oħra fil-viċinanzi.
Fost il-lokalitajiet li fihom intlemħu n-nirien hemm l-Ibraġġ, is-Swieqi, San Ġwann, San Ġiljan u Pembroke.
3:15 a.m: Ħidma biex jiġu kkontrollati nirien f’San Ġwann
Membri mid-Dipartiment tal-Protezzjoni Ċivili jinsabu għaddejjin b’ħidma biex jikkontrollaw nirien li żviluppaw fl-inħawi ta’ San Ġwann.
Dan is-sit jinsab infurmat li n-nirien żviluppaw f’Wied Għomor għall-ħabta tas-2:30 p.m u għalkemm għal xi ħin kien maħsub li n-nirien kienu ġew ikkontrollati, dawn reġgħu bdew jinfirxu tant li kellha tingħalaq it-triq għat-traffiku.
Uffiċjali ta’ Transport Malta jinsabu fil-post biex jidderiġu t-traffiku filwaqt li r-residenti qegħdin ikunu mħeġġin jagħlqu t-twieqi minħabba dħaħen li hemm fiż-żona.
