Folol kbar ta’ nies, fosthom eluf ta’ turisti, inġabru fi Pjazza San Ġorġ kif ukoll fit-toroq ewlenin tal-Belt Valletta u madwar il-Port il-Kbir biex jagħtu bidu għas-sena l-ġdida 2025.
Iċ-ċelebrazzjonijiet kbar fil-Belt Valletta kienu jinkludu spettaklu fi Pjazza San Ġorġ mill-artisti lokali Shaun Farrugia, Ira Losco u Red Electric, fost oħrajn. L-ispettaklu laħaq il-qofol tiegħu bi prestazzjoni mill-artista ta’ fama dinjija Cascada.
F’nofsillejl logħob tan-nar dawwal il-Port il-Kbir. Folol kbar dehru f’diversi punti ta’ osservazzjoni madwar il-Port il-Kbir biex jaraw il-logħob tan-nar mill-aqwa fl-isfond sabiħ tal-Port il-Kbir.
L-ispettaklu kien immexxi mill-preżentaturi lokali Dorianne Mamo, Owen Bonnici, Keane Cutajar u Taryn Mamo Cefai.
