Albaniż ta’ 29 sena baqa’ jinżamm arrestat wara li ġie mixli li darab gravi Albaniż ieħor wara argument li nqala’ f’residenza f’San Ġwann.
Enedi Tafa ġie mixli mill-Ispettur Joanna Piscopo li kkaġuna ġrieħi ta’ natura gravi fuq Evis Bardhi kif ukoll li heddu u nsulentah.
L-Ispettur Piscopo spjegat fil-Qorti li l-inċident seħħ fil-lejl ta’ bejn il-Ħadd u t-Tnejn, x’ħin il-Pulizija kienu nfurmat li kien seħħ argument bejn żewġ persuni.
Meta marru fuq il-post, sabu lill-allegat vittma bi ġrieħi f’wiċċu u kellu wkoll qasma f’moħħu. Huwa kien ittieħed l-Isptar Mater Dei fejn ġie ċċertifikat li weġġa’ gravi. Il-Pulizija baqgħu jsegwu l-każ u sussegwentement arrestaw lill-allegat aggressur.
“Dawn jgħixu fl-istess residenza, flimkien ma’ diversi persuni oħra. Ma nistax nieħu sogru li l-allegat vittma u l-allegat aggressur inpoġġuhom flimkien,” qalet l-Ispettur Piscopo filwaqt li żiedet tgħid li dakinhar tal-inċident iż-żewġt irġiel kienu qegħdin jixorbu.
Min-naħa tagħha, d-Difiża argumentat li dan kienet każ partikolari fejn żewġ persuni kienu qed jieħdu pjaċir flimkien u l-inċident li seħħ kien “ta’ darba.”
L-imputat wieġeb mhux ħati tal-akkużi miġjuba kontrih iżda baqa’ jinżamm taħt arrest preventiv wara li kellu t-talba għall-ħelsien mill-arrest miċħuda.
L-Avukat Christopher Chircop deher għal Tafa.
