Wara l-impenji tat-tim nazzjonali ta’ Taħt id-19-il sena fil-Kampjonat tal-UEFA U19 li qed isir f’Malta, il-Malta FA u Alessandro Zinnari waslu fi qbil dwar it-tmiem tar-rwol tiegħu bħala Koordinatur Tekniku tat-Timijiet Nazzjonali.
Zinnari kien figura strumentali fi ħdan is-sistema teknika tat-timijiet nazzjonali fil-koordinazzjoni tal-preparazzjoni teknika fil-gruppi ta’ etajiet differenti.
“Kienet esperjenza kbira li naħdem madwar is-setup tat-Tim Nazzjonali għal dawn l-aħħar 3 snin. Nemmen fix-xogħol tajjeb li qed isir fil-livelli kollha u nittama li dawn l-isforzi jagħtu l-frott fuq medda medja sa twila ta’ żmien għall-ġid tat-Tim Nazzjonali Malti”, qal Zinnari.
Is-sostituzzjoni ta’ Zinnari, kif ukoll il-formazzjoni tas-set-up tekniku għall-istaġun li ġej, se jkunu fuq l-aġenda tal-ewwel laqgħa tal-Bord Eżekuttiv f’Awwissu.
Il-Malta FA tixtieq tirringrazzja lil Alessandro tax-xogħol li sar f’dawn l-aħħar tliet snin u tawguralu fl-isforzi ġodda tiegħu.
