Il-President Franċiż Emmanuel Macron u martu, Brigitte, qed jippjanaw li jippreżentaw evidenza fotografika u xjentifika lil qorti tal-Istati Uniti biex jippruvaw li Brigitte Macron hija mara.
L-avukat tagħhom qal li l-president ta’ Franza u martu se jippreżentaw id-dokumentazzjoni kollha f’kawża ta’ malafama li fetħu kontra l-influencer Amerikana tal-lemin Candace Owens wara li hija enfasizzat it-twemmin tagħha li Brigitte Macron twieldet raġel.
Mal-BBC, l-Avukat tal-President Macron, Tom Clare, qal li l-allegazzjonijiet ta’ Candace Owens huma “inkwetanti b’mod inkredibbli” u kienu “distrazzjoni” għall-president Franċiż.
Clare qal li se jkun hemm “xhieda minn esperti li se tkun ta’ natura xjentifika” u filwaqt li ma żvelax, f’dan l-istadju, in-natura eżatta tagħha, qal li l-koppja Macron kienu lesti li juru bis-sħiħ “kemm ġenerikament kif ukoll speċifikament” li l-allegazzjonijiet huma foloz.
L-allegazzjoni li Brigitte Macron twieldet raġel oriġinat fi spazji online marġinali snin qabel, notevolment permezz ta’ vidjo fuq YouTube tal-2021 mill-bloggers Franċiżi Amandine Roy u Natacha Rey.
Il-koppja Macron kienu rebħu każ ta’ malafama fi Franza kontra Roy u Rey fl-2024, iżda dik id-deċiżjoni ġiet revokata f’appell fl-2025 fuq bażi ta’ libertà tal-espressjoni, mhux fuq il-bażi tal-verità. Huma kienu appellaw din is-sentenza.
F’Lulju, ressqu kawża kontra Candace Owens fl-Istati Uniti. F’każijiet Amerikani ta’ malafama kontra figuri pubbliċi, l-atturi huma meħtieġa jippruvaw “malizzja attwali” li l-konvenut konxjament xerred informazzjoni falza jew aġixxa b’diżrispett għall-verità.
L-avukati ta Owens wieġbu għall-kawża b’mozzjoni biex jiġi miċħud il-każ, fejn argumentaw li l-każ ma kellux jiġi ppreżentat f’Delaware, peress li hija tgħid li ma jirrelatax man-negozji tagħha, li huma inkorporati fl-istat.
Candace Owens qalet li temmen li dak li qed tgħid huwa l-verità u li m’hemm xejn aktar Amerikan mil-libertà tal-kelma u l-abbiltà li tikkritika.
