L-attakkant ta’ Juventus, Alvaro Morata, jinsab ħerqan li jingħaqad ma’ Barcelona dan ix-xahar u l-Bianconeri jridu jsibu sostitut b’baġit ta’ trasferimenti strett.
L-Ispanjol huwa konxju li l-Bianconeri mhux se jagħmlu t-trasferiment tiegħu permanenti fi tmiem l-istaġun u ddeċieda li jħalli Turin sitt xhur qabel tmiem is-self tiegħu.
Juventus nefqu €20 miljun fuq il-kuntratt ta’ sentejn tal-player u għandhom għażla li jakkwistaw lil Morata b’mod permanenti mingħand Atletico Madrid għal €35 miljun.
Il-Colchoneros diġà taw id-’dawl aħdar’ tagħhom għaċ-ċaqlieq ta’ Morata lejn Barcelona, iżda Juventus irrifjutaw li jieħdu lil Memphis Depay bħala parti mill-ftehim hekk kif Massimiliano Allegri talab attakkant ċentrali klassiku biex jieħu post il-player ta’ 29 sena.
