Analiżi ġdida turi li l-attakki Iranjani fuq bażijiet militari użati mill-Istati Uniti fil-Lvant Nofsani kkawżaw madwar $800 miljun fi ħsara fl-ewwel ġimagħtejn tal-gwerra.
Ħafna mill-ħsara ġiet ikkawżata fl-attakki mill-Iran fil-ġimgħa wara li l-Istati Uniti u Iżrael nedew il-gwerra. Dan skont rapport miċ-Ċentru għall-Istudji Strateġiċi u Internazzjonali (CSIS) u analiżi mill-BBC.
It-$800 miljun fi ħsara stmata lill-infrastruttura militari tal-Istati Uniti hija ċifra li hi ogħla minn dik irrappurtata qabel. Din għalhekk toffri stampa ċara tal-ispejjeż għoljin għall-Istati Uniti hekk kif il-kunflitt jibqa’ għaddej.
L-attakki tal-Iran immiraw lejn sistemi ta’ difiża tal-ajru u komunikazzjoni bis-satellita tal-Istati Uniti, fost assi oħra, fil-Ġordan, l-Emirati Għarab Magħquda u pajjiżi oħra madwar il-Lvant Nofsani.
Porzjon sinifikanti tal-ħsara kienet ikkawżata minn attakk fuq radar tal-Istati Uniti għal sistema ta’ difiża bil-missili Thaad f’bażi tal-ajru fil-Ġordan.
Is-sistema tar-radar tat-tip AN/TPY-2 tiswa madwar $485 miljun. Dan skont reviżjoni tas-CSIS tad-dokumenti tal-baġit tad-dipartiment tad-difiża. Attakki mill-Iran ikkawżaw $310 miljun addizzjonali fi ħsara stmata lil bini, faċilitajiet u infrastruttura oħra fuq bażijiet tal-Istati Uniti u bażijiet militari użati mill-forzi Amerikani fir-reġjun.
L-Iran attakka wkoll mill-inqas tliet bażijiet tal-ajru aktar minn darba. L-attakki ripetuti jenfasizzaw l-isforzi tal-Iran biex jimmira lejn assi speċifiċi tal-Istati Uniti.
L-Istati Uniti tilfet ukoll 13-il membru tas-servizz militari minn meta l-President Donald Trump ingħaqad mal-Iżrael fit-tnedija tal-attakki fuq l-Iran fit-28 ta’ Frar.
L-Aġenzija tal-Aħbarijiet tal-Attivisti tad-Drittijiet tal-Bniedem (Hrana) ibbażata fl-Istati Uniti tistma li l-għadd totali ta’ mwiet laħaq kważi 3,200, inklużi 1,400 ċivili.
Trump qal li l-Istati Uniti tinsab fit-triq it-tajba biex tilħaq l-għanijiet tiegħu li jeqred il-programm nukleari tal-Iran,
Il-gwerra ħasdet l-ekonomija globali bl-għeluq kważi sħiħ tal-Istrett ta’ Hormuz, u l-inċertezza dwar it-tul tal-kunflitt u jekk Trump hux se jibgħat truppi fuq l-art.