Il-manager temporanju ta’ Manchester United Ralf Rangnick ikkonferma li Anthony Martial irid iħalli lill-club is-sena d-dieħla.
L-aġent tal-Franċiż qabel ammetta li ż-żagħżugħ ta’ 26 sena kien ħerqan li jfittex club ġdid fost it-taqbida tiegħu biex jiskeb post fil-formazzjoni inizjali fit-team tar-Red Devils.
Rangnick inizjalment ċaħad il-kummenti tar-rappreżentant ta’ Martial, iżda l-Ġermaniż issa żvela li l-ex player ta’ Monaco huwa ħerqan li jfittex club ġdid.
“Anthony jrid iħalli l-club. Huwa qalli li jħoss li huwa ż-żmien it-tajjeb għal bidla,” qal Rangnick.
Martial kien marbut ma’ ċaqliq ma’ Barcelona, Sevilla u Newcastle United qabel it-tieqa tat-trasferimenti ta’ Jannar, għalkemm il-Magpies suppost iddeċidew li ma jakkwistawhx fix-xitwa.
L-attakkant irreġistra 79 goal u pprovda 50 assist f’268 logħba għal Man United, iżda skorja biss goal wieħed minn 10 dehriet f’dan l-istaġun.