Antonio Rudiger jinsab ħerqan li jibqa’ ma’ Chelsea, bil-Blues jagħmlu avvanz fid-diskussjonijiet dwar il-kuntratt tagħhom mal-player internazzjonali Ġermaniż.
Il-kuntratt tad-difensur ċentrali fi Stamford Bridge għandu jiskadi fl-aħħar ta’ Ġunju, u Real Madrid, Manchester United u Paris Saint-Germain huma fost il-clubs li se jkunu marbuta mas-servizzi tiegħu bi free transfer.
Rudiger kien maħsub li qed ifittex li jħalli lil Chelsea dan is-sajf biex ifittex kuntratt ta’ flus kbar, iżda l-Ġermaniż issa jrid jibqa’ mar-rebbieħa taċ-Champions League.
Iż-żewġ naħat issa qed iżommu diskussjonijiet pożittivi, b’Rudiger diżappuntat bl-offerta preċedenti li kienet tpoġġiet fuq il-mejda.
Il-player ta’ 28 sena kien f’forma qawwija għal Chelsea matul l-istaġun 2021-22, fejn għamel 27 dehra fil-kompetizzjonijiet kollha, skorja żewġ goals u pprovda erba’ assists fil-proċess.
B’kollox, Rudiger deher f’176 okkażjoni għall-Blues minn meta ngħaqad magħhom mingħand Roma fl-2017, u huwa kien player ewlieni għall-club mill-wasla ta’ Thomas Tuchel bħala manager.
