Anzjan ta’ 68 sena li kien mixli b’akkużi dwar ħasil ta’ flus li kienu ġejjin minn attività ta’ traffikar ta’ droga li allegatament kien qed jagħmel ibnu, ingħata sentenza sospiza u mmultat €75,000 wara li ammetta l-akkużi miġjuba kontra tiegħu.
Mario Brignone kien qed jaffaċċja żewġ każi separati ta’ ħasil ta’ flus b’akkużi li jmorru lura għal Ġunju 2020 u s-snin ta’ qabel, bit-tieni każ ikopri l-perjodu bejn Awwissu 2020 u April 2021.
Fit-tieni każ huwa ġie mixli wkoll li kiser il-kundizzjonijiet tal-ħelsien mill-arrest. F’April 2021, fid-dar tal-imputat nstabu madwar €15,000 fi flus kontanti, flimkien ma’ pakketti tal-plastik maħsuba li kienu qed jintużaw għat-traffikar tad-droga.
Brignone qal lill-pulizija li kien jirċievi pensjoni ta’ ftit aktar min €700 fix-xahar iżda ammetta magħhom li kellu l-vizzju tal-logħob.
Għalkemm Brignone għall-ewwel wieġeb mhux ħati, meta l-prosekuzzjoni ma kienx baqgħalha aktar xhieda u kien imiss id-difiża sabiex tressaq il-provi tagħha, huwa għażel li jwieġeb ħati tal-akkużi.Meta tat is-sentenza fiż-żewġ kawżi, il-Qorti preseduta mill-Maġistrat Donatella Frendo Dimech, osservat li dan ma kienx ta’ “self-laundering” peress li l-azzjonijiet tal-imputat kienu intiżi biex jaħbi flus ġejjin mit-traffikar tad-droga. Intqal li t-traffikant ibbenefika a skapitu ta’ dawk li kienu skjavi tal-vizzju tagħhom.
Qabel ġiet biex tagħti l-piena, il-Qorti kkunsidrat n-natura tar-reati u l-fatt li l-fedina penali tiegħu ma kinitx waħda “ta’ tħassib”. Min-naħa l-oħra iżda nnotat li huwa rreġistra ammissjoni fi tmiem il-proċeduri.
Barra minn hekk, huwa kellu jkun f’pożizzjoni aħjar li jevalwa u jiżen il-konsegwenzi tiegħu. Waqt li qalet dan, il-Qorti qalet li ma tistax tijora l-fatt li l-akkużat kien taħt il-kontroll ta’ ibnu u l-metodi “kriminali” tiegħu.
Il-Qorti għalhekk ikkundannat lil Brignone għal sentejn ħabs sospiżi għal erba’ snin f’kull każ u ordnat il-konfiska tal-assi kollha tiegħu, mobbli u immobbli.
Fl-ewwel każ il-Qorti mponiet multa ta’ €55,000 u fit-tieni każ imponiet multa ta’ €20,000 li jkunu konvertiti f’ħabs jekk ma jiġux imħallsa. Barra minn hekk, il-Qorti ordnat il-konfiska ta’ €20,000 li kien ħallas l-imputat sabiex jingħata l-ħelsien mill-arrest u jħallas €31,865 fi spejjeż tal-Qorti.
Il-Prosekuzzjoni tmexxiet mill-Ispetturi Lianne Bonello u Kevin Pulis megħjuna mill-Avukati Etienne Savona u Godwin Cini mill-Uffiċċju tal-Avukat Ġenerali. L-Avukati Franco Debono u Marion Camilleri dehru għal Brignone.
