Anthony Desira, ta’ 75 sena residenti Ħal Għaxar ingħata sentenza ta’ sentejn ħabs sospiżi għal erba’ snin hekk kif instab ħati f’każ ta’ moħqrija fuq kelb.
L-imputat instab ħati mill-Maġistrat Gabriella Vella li wettaq moħqrija u nuqqas ta’ trattament xieraq ta’ kelb tar-razza Husky, allegatament imwettqa fit-18 ta’ Awwissu 2022 u fil-ġranet u l-ġimgħat ta’ qabel.
Desira ma nstabx ħati li ġiegħel annimali jsofru uġigħ, tbatija jew dwejjaq mingħajr bżonn, instab ħati li żamm annimal mingħajr ma kien responsabbli għat-trattament xieraq tiegħu, u li naqas milli jieħu dawk il-passi raġonevoli f’kull ċirkostanza sabiex jiżgura li l-ħtiġijiet tal-annimal li kien responsabbli għalih, jew li qabel li jieħu ħsieb, jintlaħqu hekk kif meħtieġ bi prattiċi tajba sabiex tiġi żgurata s-saħħa u l-benesseri tal-annimal.
Uffiċjali tal-Animal Welfare xehdu li kienu wettqu spezzjoni f’residenza fi Triq Ħabb il-Qamħ, Ħal Għaxaq, fejn sabu kelb Husky fi stat ħażin ħafna.
Qalu li l-kelb bilkemm seta’ jiċċaqlaq, bis-suf kollu magħqud u maħmuġ. Kellu l-ikel mimli dubbien fost kundizzjonijiet ħżiena oħra. Il-kelb ġie kkonfiskat u ttieħed għall-kura.
Xhieda mis-Servizzi Veterinarji kkonfermat li l-microchip tal-kelb ma kienet irreġistrata f’ebda database, iżda l-Qorti osservat li dan il-fatt, għalkemm jista’ joħloq dubju dwar min kien is-sid reġistrat, ma jnaqqasx mir-responsabbiltà kriminali ta’ persuna li fil-fatt iżżomm jew taqbel li żżomm annimal.
Il-Qorti saħqet li l-liġi tipproteġi lill-annimali u timponi obbligi mhux biss fuq is-sid formali, iżda fuq kull min ikollu l-annimal taħt il-kura jew il-kontroll tiegħu.
Il-Qorti fis-sentenza tagħha qalet li ħadet inkunsiderazzjoni n-natura tar-reati li dwarhom l-imputat instab ħati kif ukoll il-fedina penali tiegħu, li għalkemm mhijiex waħda netta, ma turix li l-imputat jgħix ħajja ta’ kriminalità.
Ġiet ikkunsidrata wkoll l-età tal-imputat u l-problemi ta’ saħħa tiegħu, fatturi li wasslu lill-Qorti, kif propost mill-Prosekuzzjoni kif ukoll mid-Difiża, sabiex tikkontempla piena alternattiva minflok piena ta’ priġunerija effettiva.
Il-Qorti spjegat b’mod ċar lill-imputat ir-responsabbiltajiet tiegħu matul il-perjodu li se jkun taħt sentenza sospiża u wissietu dwar il-konsegwenzi jekk jikkommetti reat ieħor li jġorr piena ta’ priġunerija.
Il-Prosekuzzjoni tmexxiet mill-Ispettur Elliot Magro.