Anzjan ta’ 71 sena nżamm arrestat wara li ġie mixli li ta fastidju b’mod inċidenti lil tifla ta’ 15-il sena u ssuġġettaha għall-avvanzi sesswali tiegħu. Din it-tifla tiġi l-ġara tal-akkużat.
Ir-raġel, li ismu ma jistax jixxandar fuq ordni tal-Qorti, ġie mixli b’akkużi li jinkludu korruzzjoni ta’ minorenni u li pparteċipa f’attivitajiet sesswali mingħajr kunsens ma’ persuna taħt l-età.
L-allegati reati seħħew nhar is-Sibt li għadda f’showroom tal-karozzi, li huwa mifhum li huwa proprjetà tal-akkużat.
Fil-Qorti ntqal li l-allegata vittma u l-ġenituri tagħha kienu marru jirrapportaw fl-Għassa ta’ Ħal Qormi li r-raġel anzjan kien ittanta lit-tifla.
Huma rrapportaw li l-imputat allegatament kien ħadha f’showroom tal-karozzi u hemm seħħ l-allegat reat.
Investigazzjoni mill-Pulizija tad-Distrett flimkien mal-Iskwadra Kontra l-Vizzji wasslet għall-arrest tal-imputat. “Fl-investigazzjoni tal-pulizija, l-imputat kkopera sa ċertu punt”, qalet il-Prosekuzzjoni.
L-imputat wieġeb mhux ħati tal-akkużi miġjuba kontra tiegħu u baqa’ jinżamm taħt arrest preventiv.
Il-Prosekuzzjoni tmexxiet mill-Avukat Angele Vella mill-Uffiċċju tal-Avukat Ġenerali megħjuna mill-Ispetturi John Spiteri u Clayton Camilleri. L-Avukat Marouska Debono dehret għall-anzjan.
