Aħbar sorprendenti hija dik ta’ pjan ambizzjuż minn Vienna Cammarota, anzjana ta’ 72 sena, li beħsiebha tagħmel mixja għall-paċi twila 13,000-il mil. Din il-mara Taljana għażlet l-avventura tal-famuż Marco Polo li fih kien ivjaġġa miinn Venezja għal Beijing. Dan il-vjaġġ epiku magħmul mill-merċenarju leġġendarju huwa tul ir-rotta ta’ kummerċ antika magħrufa bħala s-Silk Road, it-triq tal-ħarir.
Cammarota telqet minn Venezja, il-belt li twieldet fiha, it-Tlieta li għadda u se tagħmel total ta’ 13,670 mili (22,000 kilometri) li jkopru xejn inqas minn 15-il pajjiż. Il-mira tagħha hija li tasal f’Beijing f’Diċembru tal-2025.
Din l-anzjana li qiegħda tkun ta’ ispirazzjoni għal ħafna nies, turi kemm l-anzjanità m’għandhiex tillimita lil dak li jkun u hija prova ta’ kemm l-età hija biss numru. Cammarota minn dejjem kienet tħobb timxi u fil-fatt ilha għal aktar minn 30 sena tagħmel dan il-passatemp san. Fl-imgħoddi hija għamlet vjaġġ bil-pass li fih qasmet Tibet, il-Palestina, l-Iżrael, Patagonia u Madagascar. L-aktar avventura riċenti li kellha kienet vjaġġ fil-bliet medjevali fir-reġjuni fin-Nofsinhar tal-Italja ta’ Campania, Calabria u Basilicata.
Qabel telqet għal dan il-vjaġġ Cammarota qalet li hija lesta għal din l-isfida li fiha se tesperjenza territorji kontrastanti u klima differenti. Dan il-vjaġġ se jeħodha fl-Ewropa, fil-Lvant Nofsani u fl-Ażja u fil-fatt ammettiet li hija xi ftit imħassba jekk jirnexxielhiex jew le.
“Qabel nibda vjaġġ, dejjem inħoss xi ftit ta’ inċertezzi,” spjegat din l-anzjana. Barra basket ħafif fuq daharha Cammarota hija mgħammra b’camera biex tiġbed il-vjaġġ li se tkun qiegħda tagħħmel kif ukoll telefon li jinkludi App li minnha t-tabib tagħha se jkun qiegħed isegwi l-kundizzjoni fiżika tagħha. Hija qalet li, “se jkun hemm mumenti ta’ sfidi kbar fosthom il-kesħa f’Mongolia, iżda nħossni ppreparata”.
Cammarota se taqsam fl-Islovenja mit-Tramuntana tal-Italja u mbagħad terħilha lejn il-Kroazja, is-Serbja, il-Bulgarija, it-Turkija, Georgia, l-Iran, Turkemenistan, Azerbaijan, Uzbekistan, Kyrgyzstan, Kazakhstan, Mongolia u finalment tasal fiċ-Ċina. Meta hija tasal fid-destinazzjoni finali tagħha se jkollha 75 sena.
Hija tittama li ssib akkomodazzjoni min-nies li se tiltaqa’ magħhom tul il-vjaġġ u dan “mhux għax irrid niffranka l-flus iżda għax nixtieq kuntatt dirett biex inkun nista’ ngħid l-istorja ta’ kull pajjiż mill-esperjenzi tan-nies li noqgħod għandhom”. Hija qalet li għandu mnejn li l-familja tagħha tingħaqad magħha f’postijiet li tkun se ddum fihom għal aktar minn jumejn.
Cammarota, li hija wkoll ambaxxatur ta’ “Archeoclub Italia”, li hija assoċjazzoni għall-preservazzoni tal-wirt kulturali, ħadet din l-idea mill-esploratur Johann Wolfgang von Goethe, l-awtur Ġermaniż li ppubblika d-djarji tal-vjaġġi tiegħu fl-Italja bejn l-1786 u l-1788 fil-ktieb “Italian Journey” (Il-Vjaġġ Taljan) u ovvjament minn Marco Polo.
Polo kien telaq minn Venezja fl-1271 fl-età ta’ 17-il sena u qatta’ aktar minn 20 sena jivjaġġa mill-Asja fi triq li aktar tard saret magħrufa bħala s-“Silk Road”. Probabbilment l-aktar Ewropew famuż li għamel dan il-vjaġġ, Polo kien kiteb l-avventuri li għadda minnhom u l-pubblikazzjoni tiegħu saret waħda mill-aktar kotba famużi fid-dinja.
“Wara Von Goethe, affaxxinajt ruħi b’Marco Polo,” spjegat Cammarota fejn żiedet tgħid li, “inħobb l-Istorja, il-kultura u l-arkeoloġija u rrid nimxi biex nara u nirrakkonta iżda aktar minn hemm irrid nisma’ r-rakkonti”.
Din l-anzjana se tkun qiegħed timxi b’żewġt ibnadar, dik Taljana u Ukrena fejn iddikjarat li din hija “mixja għall-paċi” bil-għan li “tgħaqqad il-popolazzjonijiet”.
