Dan l-aħħar kien hemm min qajjem li l-gvern, mhux qed jagħmel dak kollu li qalet l-Inkjesta Pubblika dwar il-Qtil ta’ Daphne. Ngħid li hu qtil għax assassinju jkun pilotat mill-Istat u jiġi pruvat li kien hemm xi forza tal-Istat li għenet, ikkmandat, tat daqqa t’id ħalli persuna tinqatel, u għal skop politiku. Mort nara xi kliem juża dwar il-qtil b’bomba taħt il-karozza ta’ Rosemary Nelson, avukat tad-drittijiet tal-bniedem li kienet tiddefendi l-minoranza!
Il-qtil kien sar fl-1999, u sal-lum l-Irlanda. Fl-Unjoni Ewropea u fil-Kunsill tal-Ewropa. Sal-lum għadu ħadd ma tressaq quddiem il-qrati bil-qtil tagħha.
Hawnhekk kellna storja differenti. Il-gvern aċċetta li jagħmel inkjesta pubblika, minkejja li kien hemm proċeduri kriminal pendenti. Il-Kunsill tal-Ewropa għadu sal-lum ma għamel l-ebda mozzjoni dwar l-Irlanda, jew dwar il-qtil makabru ta’ Mino Pecorelli, ġurnalist Taljan, li saħansitra kienu jindikaw li seta’ kien hemm Andreotti warajh jew nies tiegħu. Qatt ma saret mozzjoni kontra l-Italja. Kulħadd xortieh. Ir-rule of law titlob li meta jkun hemm proċeduri kriminali dawn għandhom jitħallew għaddejjin mingħajr indħil, ikun ta’ min ikun.
L-ewwel stramberija kienet li l-familja riedu li jinbidlu t-term of reference. U imbaghad kellhom oġġezzjoni għal membri nominati.
Ħalli nibda fuq it-‘terms of reference’. Meta nbidlu, kien jidher ċar għal min ma twelidx b’subgħu f’ħalqu, u baqa’ bih f’ħalqu, li dak li nbidel kien imnebbaħ mhux minn Kastilja, imma minn ftit bibien ‘l isfel fi Triq San Pawl, fejn hemm l-uffiċċju tal-Ombudsman, u dak iż-żmien żgur kien hemm konsulent Dr Joseph Said Pullicino (eks Prim Imhallef li kien magħżul skont ir-regoli l-antiki mill-Partit Nazzjonalista fil-gvern)
L-Ombudsman kien għamel rapport u ppreżentah lill-ispeaker. Meta qrajtu niftakar li splodejt. Fi ftit kliem kien qal li l-ġid li kien qed isir kien qed jintefa’ bl-arja tal-impunità li kien hawn fil-pajjiż. Il-kitba kienet tidher li Joseph Said Pullicino kellu xi biċċa mit-tifsil taghha. Oħroġ l-għaġeb il-kelma tal-impunità daħlet fit-‘terms of reference’.
Issa peress li jien ma twelidtx b’sebgħi f’ħalqi u bqajt bih (nittama li temmnuni) meta rajt din il-kelma tal-impunità, ftakart fl-istorja riċenti ta’ Malta. Qalu li kien hemm reati mhux solvuti. Fejn kien Dr Joseph Pullicino fil-25 sena ta’ gvern Nazzjonalista u miegħu l-Ombudsman. Għax sakemm inqatlet Daphne fis-16 ta’ Ottubru 2017, Gvern Laburista kien ilu biss ftit aktar minn 4 snin. U fis-snin l-oħra, u l-mafra lil Joe Ii kien irikkeb fuq spallejh lil EFA, u l-ħafna każijiet oħra ta’ bombi, dawk x’kienu? Biex jiksru l-monotonija tas-silenzju u s-sliem fil-pajjiż?
F’xahar ta’ Diċembru tas-sena 2010, kien hemm bomba ma’ Transport Malta u qtil ta’ ‘businessman’. Dawn ma jaqgħux taħt l-impunità. Id-diżgrazzja li tela’ l-gvern tal-Labour hux?
Sa hemm ma kienx biżżejjed. Riedu jibdlu n-nies tal-kummisjoni u rnexxielhom. Flok Prof Ian Refalo riedu jdaħħlu u rnexxielhom lil ħadd għajr Dr Joseph Said Pullicino, l-konsulent tal-Ombudsman, li kien l-ewwel wieħed li beda jlissen fuq l-impunità u ‘rule of law’ u teoriji oħra. Issa Profs Ian Refalo qatt ma bbaża fil-politika, qatt ma kiteb xi artiklu politiku, u dejjem kien għaqli biżżejjed li jżomm ‘il bogħod minn kull partit. Ara n-Nazzjonalisti fil-gvern m’għamluhx President tal-Qorti! Ivvinataw xi ħaġa fuq xi klijent li kellu, u allura ma kienx idoneu jew jixraq li jkun fil-kummissjoni! U dahal Dr Joseph Said Pullicino.
Iż-żewġ appartamenti.
Il-membri kellhom obbligu li jkunu mparzjali u indipendenti. U wieħed mill-prinċipji tal-imparzjalità huwa li jekk xi ħadd ikun kiteb fuq is-suġġett, m’għandux jieħu sehem. Jien nibqa’ nsostni li Joseph Said Pullicino ma kienx fi Triq San Pawl jagħti pariri lill-Ombudsman kif l-aħjar issajjar il-qaqoċċ jew il-bebbux. Jekk ħareġ dak ir-rapport bilfors li kien jaf x’fih u approvah. Tant kien parti mill-Ombudsman li meta kellu s-seduti tal-inkjesta kien jinżel bil-mixi mill-uffiċċju sal-qorti.
It-tieni prinċipju li dik l-imparzjalità trid tidher, u min ikollu xi ħaġa jiddikjaraha. Kontu tafu li oħt Daphne Caruana Galizia, Helene Asciak toqgħod fi flat 12, u Joseph Said Pullicino fi flat 13. Jekk huma ġirien ħbieb kellu jiddikjara, u jneħħi kull suspett. Jekk mhumiex ġirien ħbieb ukoll kellu jiddikjara. Tgħid meta mietet il-familja ma tawx il-kondoljanzi? Kien hemm maġistrata li astjeniet għax kienet bagħtet il-kondoljanzi lill-oħra.
Dan il-fatt ilu nafu, imma ridt inkun mija fil-mija ċert. F’pajjiż żgħir bħal tagħna fejn kulħadd jaf lil kulħadd, għalhekk jien nopponi bil-qawwa li dik l-inkjesta għandha valur ġuridiku. Joseph Said Pullicino kellu d-dover li jgħid li huwa ġar ta’ oħt il-vittma. Seta’ joħroġ b’verdett li ma jogħġobx, u jiltaqa’ fl-indana jew il-bieb ta’ barra, jew fil-lift ?
