L-inċidenti tat-traffiku li seħħew f’dawn l-aħħar xhur urew il-ħtieġa li l-miżuri ta’ infurzar mhux biss kellhom jiġu aġġornati imma wkoll li jiżdiedu b’aktar miżuri ħorox u b’pieni li jservu ta’ detterent akbar milli diġà kien hemm. Jidher bil-fatti li l-awtoritajiet saru aktar konxji tal-problema tant li ħarġu b’diversi proposti li l-għan tagħhom huwa li tiżdied is-sigurtà fit-toroq mhux biss għal min isuq imma wkoll għal min ikun miexi.
Dawn il-miżuri jidher li laqtu l-għajn tant illi l-imsieħba soċjali fuq quddiem nett il-General Workers’ Union, l-Assoċjazzjoni Maltija tal-Lukandi u r-Ristoranti u l-Assoċjazzjoni ta’ Min Iħaddem ħarġu jappoġġjaw dawn il-miżuri għal aktar infurzar fit-toroq. Fost dawn il-miżuri hemm li mhux biss jissaħħu u jiħraxu l-pieni imma wkoll se tispiċċa s-sistema ta’ sentenza sospiża mill-Qrati għal min jikkawża mewt meta jkun qed isuq taħt l-effett tal-alkoħol jew tad-droga. Bla dubju, dan kollu jkun jinħtieġ investiment akbar u kontinwu kif ukoll li jiżdiedu l-ispezzjonijiet anke għal għarrieda, anke bl-użu ta’ testijiet moderni li jikkalkulaw mhux biss il-volum imma wkoll il-kwalità ta’ sustanza li jkun ikkonsma s-sewwieq.
Dawn il-miżuri huma pass mill-aktar importanti biex jekk ma jtemmux għalkollox dawn l-inċidenti, almenu jrażżnuhom u jnaqqsuhom kemm jista’ jkun. Minkejja li l-miżuri msemmija għadhom ma daħlux fis-seħħ minħabba li trid issir diskussjoni dwarhom meta l-Parlament jirritorna wara l-btajjel tas-sajf, l-uffiċjali tal-infurzar – il-Pulizija, il-LESA u Transport Malta – f’dawn l-aħħar jiem diġà qabdu sewwieqa jsuqu taħt l-effett tal-alkoħol. Dan jirrifletti f’riżultati aħjar waqt il-kontrolli tat-traffiku li qed isiru anke matul il-lejl. Diġà hemm dikjarazzjoni mill-Korp tal-Pulizija li jibqa’ kommess li jkompli bil-kontrolli tat-traffiku b’mod regolari f’kull ħin tal-ġurnata bil-għan li tiġi mħarsa s-sigurtà ta’ dawk kollha li jużaw it-toroq tagħna.
Din ir-riforma mistennija li tkompli tibni fuq il-passi u l-miżuri li diġà ttieħdu biex jiġu protetti ċ-ċittadini aktar u aktar meta l-għadd ta’ karozzi fit-toroq tagħna żdied sew. L-infurzar waħdu mhux biżżejjed imma għandu jkun hemm sens ċiviku minn kulħadd fl-obbligu li jagħmel il-parti tiegħu biex it-toroq tagħna jkunu aktar ħielsa mill-inċidenti żgħar jew anke gravi.