B’ġimgħa eżatt bogħod mill-ġurnata tal-Milied, bosta persuni rħewlha sal-Belt Kapitali sabiex jixtru l-aħħar ftit rigali u jgawdu l-atmosfera u jqattgħu ftit ħin ta’ kwalità mal-għeżież tagħhom f’xi kafetterija jew xi ristorant fil-qalba tal-Belt.
Matul il-jum tal-Ħadd, il-komunità tal-Pulizija tellgħet avveniment fi Pjazza San Ġorġ bl-isem ta’ “Christmas in the Community” bis-sehem tal-pulizija tal-komunità u tad-distretti, il-Mounted Section, is-sezzjoni K9, Special Intervention unit u t-taqsima tal-Forensika. Esebiti kien hemm ukoll xi karozzi tal-pulizija u muturi tal-pulizija.
Grupp ta’ żeffiena wkoll ingħaqdu mal-Forzi Armati tal-Pulizija waqt din l-attività.
Min-naħa tagħhom, id-Dipartiment tal-Protezzjoni Ċivili wkoll tellgħu avveniment quddiem il-Parlament Malti b’risq l-Istrina fejn kien hemm esebiti uħud mill-vetturi li jintużaw waqt ħidmiethom.
Ċertament li attivitajiet bħal dawn qanqlu entużjużmu fost kull min daħal sal-Belt Valletta, b’mod speċjali t-tfal f’dawn iż-żmien ta’ festi.
