“Bi pjaċir inħabbru l-firma ta’ atleta Malti fil-federazzjoni Taljana”. Iddikjara dan il-President tal-Federazzjoni Taljana Braccio di Ferro S.B.F.I Claudio Rizza hekk kif ftit tal-ħin ilu l-atleta Malti tal-arm wrestling Kersten Mercieca ffirma l-kuntratt magħhom.
Rizza qal li huwa ta’ unur għalihom li jkollhom lil Kersten parti mill-federazzjoni tagħhom u awguralu kull suċċess.
F’kuntatt ma’ Talk.mt fl-ewwel reazzjoni tiegħu wara s-sħubija tiegħu mal-federazzjoni Taljana, Mercieca qalilna li maħkum minn emozzjonijiet imħallta għax verament ferħan li jinsab daqstant apprezzat minn din il-federazzjoni, iżda diżappuntat li fl-aħħar mill-aħħar il-ħolma tiegħu li jikseb aktar riżultati taħt il-kappa Maltija baqgħet ma saritx realtà għax l-appelli tiegħu waqgħu kollha fuq widnejn torox.
