Ftit tal-ħin ilu l-missier u l-iben tant maħbubin mid-diversi segwaċi tagħhom waslu l-Awstralja fejn se jkunu qegħdin jibdew l-avventura li fuq kollox kienet il-ħolma taċ-ċkejken.
Jomike u Lydon rifsu l-Awstralja proprju ftit tal-ħin ilu fejn se jkunu qegħdin jagħmlu xahar sħiħ inklużi wirjiet ta’ Makjetti bejniethom u Lydon li se jkun qiegħed jagħmel ukoll shows ta’ Elvis Tribute.
Mitlub kumment minn dan is-sit, il-missier qalilna li jinsabu għajenin ħafna wara vjaġġ daqshekk twil, iżda eċitati biex jirrealizzaw din il-ħolma li għalih kienet wiegħda jekk kemm-il darba kienu jirbħu s-somma abbinata mal-premju tal-X Factor Malta. Jomike xtaq jirringrazzja lil Joe Borg li għenhom fit-tħejjijiet biex dan il-vjaġġ seta’ jkun possibbli.
Iċ-ċkejken dak iż-żmien kien fetaħ qalbu dwar ix-xewqa li jmorru l-Awstralja u wara li b’wirja wara l-oħra baqgħu jżidu fil-fama u jirbħu s-simpatija tal-poplu inġenerali, fl-2020 huma rnexxielhom jirbħu l-ewwel edizzjoni tal-kompetizzjoni.
