Miktub Minn Victor Vella, Filmat Alan Saliba
“Tfajla minuri. Ma kinitx għadha għalqet is-sittax-il sena. Bagħtet ritratti partikolari tagħha lil ġuvni li kienet qed toħroġ miegħu. Bgħatithomlu fuq il-mowbajl. Ġara li l-mowbajl tiegħu ma kienx protett minn password. Sħabu biex jiċċajtaw ħadulu l-mowbajl u sabu r-ritratti. Li seħħ wara kien li r-ritratt provokanti tat-tfajla spiċċaw iduru fuq l-internet u anke spiċċaw waslu għand familjari u qraba ta din it-tfajla”.
Dan hu wieħed biss mill-każijiet li ġew investigati b’rabta ma’ ritratti provokanti u sesswali li jintbagħtu mit-tfal u żgħażagħ fil-gruppi ta’ bejniethom. Dan flimkien ma’ każijiet oħra fejn pedofeli jew persuni oħra jispiċċaw jitkellmu ma’ tfal u anke jibdew jitolbuhom ritratti tagħhom. Ma jonqsux każijiet ta’ rikatt, fejn xi drabi it-tfal jintalbu jibagħtu aktar ritratti, inkella jiġu mhedda li r-ritratti jew vidjos li jkunu diga intbagħtu, jiġu ċċirkolati mal-ġenituri, qraba jew ħbieb tagħhom. Sfortunatment dan l-abbuż onlajn fuq it-tfal, li jħalli problemi psikoloġiċi u joħloq ukoll problemi oħra, żdiedu sew minħabba l-pandemija, fejn il-minuri kienu kostretti iqattgħu aktar ħin onlajn, ħafna drabi jesperimentaw b`mezzi soċjali differenti.
Inewsmalta, f’intervista ma’ Graziella Castillo, Assistent Direttur fl-Aġenzija Appoġġ fejn hi tieħu ħsieb is-servizz , li jitratta dawn it-tip ta’ abbużi, ġie spjegat li mhux biss jirreferu l-każi lill-Pulizija imma anke joffru appoġġ lill-vittmi u l-ġenituri tagħhom.
Graziella Castillo, spjegat li dan l-abbuż fuq it-tfal żdied sew minħabba l-pandemija u dan minħabba li għal xhur sħaħ ħafna tfal kienu qegħdin iqattgħu ħafna aktar ħin onlajn fuq diversi pjattaformi. Hi spjegat li matul is-sena 2019 biss kien hemm 290 każi ta’ rapport li saru fuq il-hotline (childwebalert) u 415 telefonati relatati ma dan is-suġġett li saru fuq Supportline 179. Dan ifisser kważi żewġ każi ta’ rapporti kuljum matul 2019 L-indikazzjonijiet għal 2020 juru li ser ikun hemm aktar każijiet, li wieħed irid janalizza fl-isfond ta` dak li qegħdin ngħixu bħalissa.
L-isfruttament sesswali tat-tfal qed jiżdied
L-Assistent Direttur, Graziella Castillo spjegat li “aħna għandna is-servizz “ChildWebAlert’. Fih persuni li jiltaqgħu ma’ ritratt jew filmati fejn ikun qed jidher li tfal ġew abbużati jew sfruttati sesswalment, jitkellmu magħna, jew jibgħatulna l-link tal-websites u aħna ninvestigaw. Ninfurmaw u naħdmu wkoll mat-Taqsima tac-Cybercrime unit fi ħdan il-Pulizija. Aħna membri ukoll tal-assoċjazzjonijiet barranin ‘Insafe’ u “Inhope”. Fit-18 ta’ Novembru hu l-Jum Ewropew dwar il-protezzjoni tat-tfal kontra l-abbuż u sfruttament sesswali.”
Saħqet li “s-servizz tagħna dejjem jaħdem sabiex iqajjem kuxjenza fuq dan il-kunċett. Is-servizz tagħna mhux biss jara li jiġu ippubblikati artikli fuq midja, imma anke nagħmlu sessjonijiet ta’ għarfien ukoll għal għaqdiet mhux governattivi li jaħdmu ma’ tfal u żgħażagħ.”
Bil-pandemija il-każijiet żdiedu
Meta mistoqsija dwar l-effett tal-pandemija fuq dan il-fenomenu, hi qaltilna li “nistgħu ngħidu li bil-pandemija qed naraw żieda fil-każi. Aħna favur li tfal ikunu online u l-fatt li jużaw l-internet hi xi ħaġa tajba. Imma hemm sitwazzjoni fejn tfal bejniehtom jispiċċaw itellgħu ċertu ritratti. Ritratti provokattivi u sesswali. X’jiġri? Huma jixxerjawhom ma’ sħabhom. Meta jirċievu dawn ir-ritratt ikun hemm min jibda jixxerjaħ fuq is-sit soċjali jew pjattaformi oħra. Irridu noħolqu għarfien biex it-tfal ikunu konxji tar-ritratti li jkunu qed itellgħu jew jixxerjaw. Fost dawn ikun hemm ritratti li mhumiex diċenti. Importanti wkoll li nwasslu l-messaġġ illi it-tixrid ta` dawn it-tipi ta’ ritratti jew vidjos huwa illegali ”.
Enfasizzat li “rridu nqajmu kuxjenza fost ġenituri biex huma ukoll ikollhom gwida u jinnotaw ċerti affarijiet. It-tfal ikun hemm diversi raġunijiet għaliex ixerrdu ritratti tagħhom. Ikunu fi gruppi u jibdew jikkompetu bejniethom dwar il-likes li se jġib ir-ritratt. Kemm se jżidu followers. Dak l-eċċitament u aktar iwassal għal aktar ritratt provokattivi u tidħol pika bejniethom. Din tal-likes hi xi ħaġa li ttihom ċertu boost fil-perjodu li jkunu għaddejjin minnu. Hi xi ħaġa li lilhom ttihom importanza u jidhru ‘cool’ ma sħabhom.
Graziella Castillo saħqet li “bil-pandemija intilef għal kollox il-bilanċ li suppost għandu jinżamm bejn ħin onlajn u ħin li jgħaddu soċjalment. It-tfal spiċċaw ġewwa. Ħafna minnhom ma kellhomx x’jagħmlu u bdew jintefgħu aktar onlajn. Hawn il-pedofeli jaħtfu l-opportunità għax jafu li tfal bdew jibqgħu aktar ġewwa u allura bdew aktar ifittxuhom u jistaqsuhom għar-ritratti”.
It-tfal jgħaddu minn trawma
Tispjegalna li “t-tfal jiġu affettwati ħafna meta jgħaddu minn dan l-abbuż. Ibatu ħafna mill-aspett psikoloġiku. Meta jgħaddu minn sitwazzjonijiet simili jibdew jirrifjutaw li jmorru l-iskola. Jibdew jistħu. Isiru aktar riservati. Jibdew jinqatgħu anke minn mal-ġenituri u dan minħabba li jibdew jaħsbu li l-ġenituri jkunu raw dawk ir-ritratti. Aħna fil-kampanji li nagħmlu nitkellmu dwar dawn l-effetti jew kif it-tfal jibdew jinbidlu u li jista jkun li dan juri li jkunu għaddew minn xi abbuż. Tiġi affettwata wkoll is-saħħa mentali tagħhom.”
Insibu koperazzjoni mill-iskejjel
Enfasizzat li “numru sostanzjali tal-każijiet jiġu riferuti lilna mill-iskejjel. Ġieli jkollna ġenituri li huma stess jindunaw b’ċertu attitudnijiet u jitkellmu magħna biex jieħdu l-pariri. Aħna nagħmlu sessjonijiet ta’ informazzjoni anki fil-iskejjel u f`għaqdiet mhux governattivi li għandhom kuntatt mat-tfal u ż-żgħażagħ..”
Tisħaq li “bħala proġett – iċ-ChildWebAlert’, aħna qegħdin f’konsorzju akbar li hu l-BeSmart Online. Fih hemm ukoll Tech.mt, l-Uffiċċju tal-Kummissarju għat-Tfal, il-Pulizija ta’ Malta, id-Direttorat għall-Programmi ta’ tagħlim u Assessjar fid-Dipartiment tal-Edukazzjoni flimkien magħna bħala Aġenzija Appoġġ fi ħdan l-FSWS.
Hi realtà li qiegħda hemm u mhux se tispiċċa
Tisħaq li “dan l-abbuż fuq tfal qiegħed hemm u mhux se jispiċċa. Irridu nqajmu dejjem aktar kuxejnza. It-tema ta’ din is-sena hi l-prevenzjoni ta’ imġieba sesswali u ritratti jew vidjos ssesswali generati mit-tfal infushom”. L-appell huwa wiehed li t-tfal u ż-żgħażagħ jaħsbu qabel itellaw xi ritratti onlajn, għax la darba qiegħed fuq il-midja soċjali, wieħed ma jkollux kontroll ta’ min qiegħed jarah u jixxerjah.
Min irid jirraporta xi ritratti jew vidjos, li jaħseb li qed iwasslu għal sfruttar jew abbuż sesswali ta’ minuri jista’ jagħmel dan fuq il-website, childwebalert.gov.mt jew iċempel għal gwida fuq is-Supportline 179.
