Raġel ta’ 39 sena residenti Birkirkara ġie arrestat wara investigazzjonijiet b’rabta ma’ attentat ta’ serqa minn ħanut f’Birkirkara stess.
Is-serqa kienet seħħet fit-30 ta’ Jannar illi għadda, meta għal xi l-10:00 a.m.,
raġel daħal f’ħanut fi Triq il-Wied u hedded lill-impjegat b’sikkina. L-impjegat irnexxielu jiddefendi ruħu u l-ħalliel ħarab minn fuq il-post mingħajr ma seraq xejn.
Mill-investigazzjonijiet illi saru, il-Pulizija identifikat l-allagat ħalliel u ġie arrestat ilbieraħ. Aktar kmieni llum, ir-raġel tressaq b’arrest fil-Qorti quddiem il-Maġistrat Dr Ingrid Bianco LL.D fejn kien akkużat bl-attentat ta’ serqa, u li żamm persuna kontra l-volontà tagħha, fost oħrajn.
Huwa wieġeb ħati tal-akkużi, bis-sentenza mistennija tingħata fl-20 ta’ Frar li ġej.