Arsenal għadhom interessati fil-midfielder ta’ Juventus, Arthur, qabel it-tieqa tat-trasferimenti tas-sajf.
Il-Gunners kienu marbuta b’mod qawwi mal-player internazzjonali tal-Brażil f’Jannar, iżda s-suq għalaq bil-player ta’ 25 sena jibqa’ jilgħab mal-Bianconeri.
Il-midfielder kien regolari għal Juventus matul l-istaġun 2021-22, u għamel 28 dehra fil-kompetizzjonijiet kollha, inklużi 18-il ħarġa fis-Serie A.
Madankollu, għad hemm l-inċertezza dwar il-futur fit-tul tiegħu ma’ Juventus, bil-club maħsub li hu miftuħ biex ibigħu fis-suq li ġej.
Arsenal għadhom ħerqana li jakkwistaw is-servizzi tal-player mill-Amerika t’Isfel u qed jikkunsidraw li jerġgħu iqajmu l-interess tagħhom fih qabel l-istaġun 2022-23.
Arthur skorja goal u pprovda assist wieħed f’60 dehra għall-Bianconeri minn meta ngħaqad magħhom mingħand Barcelona f’Settembru tal-2020.
Arsenal huma mistennija li jkunu attivi matul it-tieqa tat-trasferimenti ta’ dan is-sajf, għalkemm id-daqs tal-baġit tagħhom x’aktarx jiddependi fuq jekk jistgħux jiksbu post fiċ-Champions League għall-istaġun li ġej.
