Arsenal offrew lil William Saliba lil Manchester City bħala parti minn ftehim ta’ player flimkien ma’ flus kontanti għal Raheem Sterling.
Il-kuntratt tal-player internazzjonali Ingliż fl-Etihad Stadium għandu jiskadi fis-sajf tal-2023, u t-taħdidiet dwar estensjoni maċ-champions tal-Premier League għad iridu jħallu l-frott.
Wara li ħadem ma’ Sterling fi żmienu bħala l-assistent ta’ Pep Guardiola, Mikel Arteta huwa ħerqan li jerġa’ jingħaqad mal-player ta’ 26 sena – li kien ukoll marbut ma’ Barcelona – fl-Emirates Stadium.
Arsenal ipproponew ftehim ta’ player flimkien ma’ flus kontanti lil City, b’Saliba jkun wieħed mit-tliet players offruti lit-team ta’ Guardiola kif ukoll Gabriel Martinelli u Alexandre Lacazette.
Saliba għad irid jagħmel dehra mal-ewwel team ta’ Arsenal u bħalissa jinsab fit-tielet perjodu tiegħu ‘l bogħod mill-club ma’ Marseille, iżda rapport riċenti indika li kien se jingħata opportunitajiet fil-livell tal-kbar ta’ Arsenal fl-istaġun li ġej.
Iż-żagħżugħ ta’ 20 sena lagħab id-90 minuta sħaħ f’seba’ logħbiet tal-Ligue 1 f’dan l-istaġun, filwaqt li Sterling beda biss żewġ logħbiet fil-Premier League fl-istaġun 2021-22 s’issa.
