Il-leaders b’sorpriża tal-Premier League, Arsenal, qed jittamaw li jakkwistaw lill-winger internazzjonali Portugiż, Pedro Neto, 22 sena, mingħand Wolves qabel ma jagħlaq is-suq tat-trasferimenti fl-1 ta’ Settembru.
Il-Gunners għamlu l-biċċa l-kbira tan-negozju tagħhom tas-sajf kmieni, fejn kisbu lil Gabriel Jesus, Fabio Vieira, Oleksandr Zinchenko, Marquinhos u Matt Turner qabel ma beda l-istaġun 2022/23 fil-bidu ta’ dan ix-xahar.
Iżda l-manager Mikel Arteta esprima x-xewqa tiegħu li jiffirma player ieħor qabel jagħlaq is-suq tat-trasferimenti.
Diskussjonijiet indiretti ilhom għaddejjin xahar, b’Arsenal jitkellmu mar-rappreżentant ta’ Neto, Jorge Mendes.
Madankollu, Wolves m’għandhomx il-ħsieb li jbiegħu lil Neto dan is-sajf u l-fatt li hu taħt kuntratt f’Molineux sal-2027 isaħħilhom idejhom fin-negozjati.
Il-ftehim huwa kkumplikat aktar mill-inkapaċità ta’ Arsenal li jonfqu flus kbar fuq il-Portugall minħabba restrizzjonijiet tal-Financial Fair Play.
Madankollu, Arsenal qed jittamaw li jilliberaw spazju fil-kontijiet tas-salarji billi jisilfu lil Nicolas Pepe, li huwa l-akkwist rekord tal-club, lil Nice ta’ Ligue 1.
Dan jista’ jiffaċilitá l-ingaġġ ta’ Neto, li fi tmiem il-ġimgħa kien fil-formazzjoni inizjali fit-telfa li Wolves sofrew kontra Tottenham bl-iskor ta’ 1-0.
Il-Gunners huma l-uniku team tal-Premier League b’punti massimi wara tliet logħbiet fil-bidu ta’ dan l-istaġun wara t-trijonf tagħhom ta’ 3-0 fuq Bournemouth.
It-team ta’ Arteta se jirritorna għall-azzjoni kontra Fulham fil-logħba tas-Sibt filgħaxija.
