Athletics Malta ċċelebrat lill-aqwa atleti tal-istaġun waqt is-serata tradizzjonali tal-aħħar sena fejn Gina McNamara u Jared Micallef rebħu l-premju prestiġjuż ta’ Atleti tas-Sena.
Jared Micallef kellu sena mill-aqwa li laħqet il-qofol tagħha bil-parteċipazzjoni tiegħu fil-Kampjonati Dinjija f’Tokjo, fejn kien l-uniku rappreżentant Malti. Hemm kiseb ħin ta’ 1:46.62 fuq distanza ta’ 800m li permezz tiegħu kwalifika għal-Logħob tal-Commonwealth tal-2026. Dan wara li aktar kmieni kiseb rekord nazzjonali ġdid dan l-istaġun b’ħin ta’ 1:46.08 fil-Kampjonati Awstraljani. Huwa rebaħ ukoll erba’ midalji tal-fidda waqt il-Logħob tal-Pajjiżi ż-Żgħar tal-Ewropa, fuq id-distanza ta’ 800m, 1500m, u r-relay 4x400m tal-irġiel kif ukoll 4×400 imħallta.
Gina McNamara tat kontribut importanti biex televa l-ġiri fuq distanzi medji, hekk kif wettqet rekord nazzjonali ġdid fl-1500m, b’ħin ta’ 4:12.28 f’Montreal. Fil-Kampjonat Ewropew tat-Timijiet, hija għenet lit-Tim Malti biex jikseb il-ħames post, grazzi għal rebħiet fit-800m u l-1500m, kif ukoll fil-4×400 relay imħallta. Hija kkonkludiet l-istaġun b’doppjetta fil-Kampjonati Nazzjonali.
L-istaġun Ii għadda kien wieħed fejn bosta atleti promettenti taw wirjiet eċċellenti barra minn xtutna. Rachela Pace waslet sal-finali fit-triple jump fil-World University Games filwaqt li Matthew Galea Soler temm fil-ħames post fil-finali tal-400m tal-Kampjonati Ewropej U20, wieħed mill-aqwa riżultati għal atleta Malti fuq dak il-livell.
Thea Parnis Coleiro kisbet is-sitt post fil-200m fil-European Youth Olympic Festival, u kemm Pace kif ukoll Clare McNamara kwalifikaw għal finali tal-NCAA Championships fl-Istati Uniti.
L-atleti Maltin kisbu suċċess anke fil-Logħob tal-ISF, l-International School Sport Federation Games (ISF). Il-hurdler Kayleigh Anne Ellul kisbet żewġ midaji tal-bronż fil-100m u t-300m hurdles, filwaqt li anke r-relay tat-tfajliet 4×100m relay team (Kristina Azzopardi, Leah Frendo, Carey Spiteri u Kayla Slack), kisbu t-tielet post fuq il-podju. Matteo Gauci wkoll kiseb midalja tal-bronż b’wirja mill-aqwa fuq 800m. Il-Logħob tal-FISEC u l-Logħob taż-Żgħażagħ f’Brno wkoll wasslu prestazzjonijiet li għamlu unur għal Malta.
Għal darb’oħra, il-Logħob tal-Pajjiżi ż-Żgħar kienu suċċess għat-Tim Malti, b’19-il midalja mirbuħa, prestazzjoni kkonfermata fil-Kampjonat Ewropew tat-Timijiet, fejn Malta temmet il-ħames minkejja bosta atleti neqsin.
Waqt is-serata, kienu premjati wkoll Antonella Chouhal u Rachid Chouhal bħala Atleti Masters tas-Sena. Antonella kisbet tefa’ ta’ 42.34m fil-hammer filwaqt li Rachid qabeż 6.10m f’Challenge Meet ta’ Athletics Malta. It-tnejn li huma kisbu r-raba’ pożizzjoni fil-kompetizzjonijiet rispettivi fil-Kampjonati Dinjija tal-Masters. Fil-Kampjonati Ewropej tal-Masters, Lisa Bezzina kisbet il-bronż fil-W45 5000m u Charlton Debono rebaħ il-fidda fin-Nofs Maratona fil-kategorija tal-irġiel M40.
Fl-ewwel diskors uffiċjali tiegħu, il-President ta’ Athletics Malta Mario Bonello faħħar is-sena eċċezzjonali għall-atleti Maltin, kemm fuq livell ta’ seniors kif ukoll taż-żgħażagħ. Huwa tkellem dwar il-kontribut kruċjali tal-familji, kowċis, klabbs, voluntiera u rringrazzja lill-Kunsil ta’ Athletics Malta. Huwa esprima l-impenn tal-Kunsill li jsaħħaħ akltar l-istrutturi eżistenti, li jinħolqu aktar opportunitajiet għall-atleti u li jkompli jibni fuq il-momentum pożittiv tal-atletika Maltija.
