Għat-tielet sena konsekuttiva, l-Amerikan Grant Holloway, rebaħ il-110 metres hurdles b’mod mill-aktar dominanti.
Iż-żagħżugħ ta’ 25 sena, li rebaħ fl-2019 f’Doha u s-sena l-oħra f’Eugene, mill-ewwel hurdle deher li kien se jirbaħ din it-tellieqa biex waqqaf l-arloġġ f’ħin ta’ 12.96 sekondi.
Wara li qasam il-linja tar-rebħa, Holloway wera tliet swaba’ u għajjat “wieħed – tnejn – tlieta!” lill-folla preżenti li tatu ovazzjoni tremenda.
“Ninsab mingħajr kliem,” huwa qal. Din ir-rebħa qatt ma tista’ tkun daqs l-ewwel waħda … iżda se nibqa’ ngħożżha f’qalbi għal dejjem.”
Hansle Parchment tal-Ġamajka rebaħ il-fidda fi13.07 sekondi, filwaqt li Daniel Roberts tal-Istati Uniti daħal fi 13.09 u rebaħ il-bronż.
