Fi stqarrija maħruġa mill-uffiċċju tal-Prim Ministru ntqal li b’referenza għal rapporti li dehru dwar l-attività ‘A Night at the Palace’ li sar l-Erbgħa 12 ta’ Lulju fil-Palazz tal-Girgenti, qed jiġi ċċarat li din kienet attività kulturali bis-sehem tal-Orkestra Filarmonika Nazzjonali u li saret bi skop li jinġabru fondi għal kawża ġusta.
L-istqarrija tkompli biex tispjega li din ma kinitx l-ewwel darba li ġie organizzat dan il-kunċert u d-data tiegħu kienet ilha skedata diversi xhur u mħabbra iktar kmieni dan ix-xahar. Barra minn hekk intqal ukoll li l-pubbliku seta’ jattendi għal din l-attività mingħajr ħlas u minflok seta’ jagħti donazzjoni b’risq l-għaqdiet li jaħdmu favur il-ħarsien tal-annimali.
