Is-Sibt filgħodu fil-pjazza prinċipali ta’ Ħaż-Żebbuġ saret attività li laqqgħet flimkien residenti ta’ etajiet differenti u li saħħqet l-importanza ta’ komunità li taħdem biex tgħin lill-anzjani jgħixu b’mod attiv u b’saħħtu. Ħafna mill-partċipanti sfruttaw din l-okkażjoni biex jagħmlu kontrolli tas-saħħa bħall-pressjoni, iz-zokkor u l-vista—servizzi li tpoġġew għad-dispożizzjoni tal-pubbliku sabiex is-saħħa preventiva ssir aktar aċċessibbli.
L-attività, organizzata mis-Segretarjat għall-Anzjanità Attiva taħt it-tema “Ġenerazzjonijiet Magħqudin għall-Futur B’saħħtu”, offriet spazju fejn ħafna nies setgħu jifhmu aħjar liema servizzi huma disponibbli għall-anzjani u kif jistgħu japplikaw għalihom. Il-preżenza ta’ voluntiera, fosthom persuni b’klieb terapewti li jagħtu kontribut prezzjuż fir-residenza San Vinċenz De Paul, żiedet element komunitarju u ta’ solidarjetà mal-attività.
Is-Segretarju Parlamentari Malcolm Paul Agius Galea saħaq fuq kemm hu essenzjali li l-anzjani jibqgħu integrati fil-komunità tagħhom u li s-servizzi jkunu qrib tagħhom. Huwa enfasizza kemm il-ħajja indipendenti, is-sigurtà u l-kuntentizza tal-anzjani jibqgħu prijorità, filwaqt li l-pubbliku kollu jingħata x’jifhem li s-saħħa għandha tiġi mħarsa tul il-ħajja kollha, mhux biss fiż-żmien tal-anzjanità. Dan l-approċċ jgħin biex jitnaqqsu l-mard kroniku u jissaħħaħ futur fejn is-servizzi għall-anzjani jkunu aktar sostenibbli.
Din l-attività f’Ħaż-Żebbuġ hija l-ewwel waħda minn sensiela ta’ inizjattivi li se jiġu organizzati f’diversi lokalitajiet madwar Malta, bil-għan li aktar komunitajiet igawdu minn servizzi u appoġġ aktar viċin tagħhom.