Il-kumpanija BCRS Malta, l-operatur liċenzjat tal-Iskema Nazzjonali tar-Rifużjoni tal-Kontenituri tax-Xorb, ħabbret titjib importanti fil-magni Jumbo Reverse Vending Machines (RVMs) tagħha madwar il-Gżejjer Maltin. Mit-Tnejn, 2 ta’ Frar 2026, il-magni Jumbo RVM kollha ġew mgħammra b’Comingle Compactors, li jippermettu d-depożitu f’daqqa kemm ta’ fliexken tal-plastik kif ukoll ta’ kontenituri tax-xorb tal-aluminju f’volumi kbar.
Dan it-titjib għandu l-għan li jkompli jtejjeb l-esperjenza tal-utent u jagħmel il-parteċipazzjoni fl-iskema aktar effiċjenti u konvenjenti. Peress li l-kontenituri tal-PET u tal-aluminju jistgħu jitpoġġew flimkien, il-kompatturi l-ġodda jnaqqsu l-ħin meħtieġ għall-immaniġġjar u jissimplifikaw il-proċess tar-ritorn, filwaqt li jinżammu l-istandards għoljin ta’ rkupru tal-materjal meħtieġa taħt l-iskema.
Il-Jumbo RVMs huma disponibbli f’għaxar siti ta’ BCRS madwar Malta u Għawdex, fejn kull wieħed minnhom huwa mħaddem b’attendant fuq il-post biex jassisti lill-klijenti. Dawn jinsabu fiż-Żona Industrijali tax-Xewkija (Għawdex), iż-Żona Industrijali ta’ Bulebel, iż-Żona Industrijali ta’ Ħal Far, iż-Żona Industrijali tal-Marsa, iż-Żona Industrijali ta’ San Ġwann, Kirkop, Luxol, il-Mellieħa, is-Salina u Ta’ Qali.
F’kumment dwar dan it-titjib, il-Kap Eżekuttiv ta’ BCRS Malta, Alexander Galea, qal: “Aħna kontinwament nisimgħu l-feedback tal-pubbliku u ninvestu mill-ġdid fl-iskema sabiex nagħmluha aktar aċċessibbli, effiċjenti u faċli biex tintuża. L-installazzjoni tal-Comingle Compactors fis-siti kollha tal-Jumbo RVMs hi pass ieħor lejn aktar konvenjenza għall-parteċipanti, filwaqt li tissaħħaħ il-kontribuzzjoni ambjentali tal-Iskema ta’ Rifużjoni tal-Kontenituri tax-Xorb għall-pajjiż kollu.”
BCRS Malta tibqa’ impenjata fl-iżvilupp kontinwu tal-iskema permezz ta’ titjib operattiv u investiment fl-infrastruttura, sabiex tappoġġja rati ogħla ta’ ritorn u tikkontribwixxi għat-tnaqqis tal-iskart u l-miri nazzjonali tar-riċiklaġġ.
