Il-Gvern daħħal emendi fil-kompożizzjoni tal-Public Contracts Review Board biex isaħħaħ l-effiċjenza u jaqta’ kull dubju fuq kunflitti ta’ interess. Għalhekk huwa għal kollox falz dak li qed tipprova tpinġi l-Oppożizzjoni, li l-proċess se jinħakem minn xi ħadd. Anzi bil-kontra, se tkompli tissaħħaħ it-trasparenza u l-governanza.
Taħt is-sistema preċedenti, il-membri sostituti fuq il-bord kienu utilizzati biss f’każijiet ta’ kunflitt ta’ interess, li kien qed ifisser li l-President, il-Viċi President, u l-membru wieħed permanenti kienu qed jittrattaw l-maġġoranza tal-każijiet. F’ċertu istanzi dan kien qed jirriżulta f’dewmien konsiderevoli fil-proċess. Permezz tal-emendi fil-kompożizzjoni tal-Bord, il-PCRB se jkollu iżjed flessibilità u se jkun attrezzat sabiex jiskeda u jisma’ aktar każijiet f’inqas żmien. Dan kollu jikkontribwixxi sabiex il-Bord ikun iżjed effiċjenti. Il-proċess tal-ħatra tal-membri fuq il-PCRB se jibqa’ kif kien qabel.
Barra minn hekk, għal kuntrarju ta’ dak li qed tgħid l-Oppożizzjoni, it-tibdil li sar speċjalment fil-ħatra ta’ membri ġodda fil-Bord, huma ntiżi sabiex jiżguraw li ma jkun hemm l-ebda kunflitt ta’ interess. Dan it-tibdil qed isir b’konformità assolut ma’ sentenza tal-Qorti.
