L-Unjoni Ewropea se tibgħat uffiċjal għoli f’Malta li waħda mill-kwalifiki li kellu bżonn biex isir kien li jaf jifhem u jitkellem bil-Malti.
Il-Kummissarju nzerta mill-Latvja, u għalhekk kellu għażla diffiċli. Għax il-Kummissarju (ħalli jifhem kulħadd, ifisser il-Ministru fl-Unjoni Ewropea) ma jitkellimx bil-Malti. U kellu jagħżel wieħed li jaf il-Malti. Kif se jagħmel? Povru Kummissarju! Għażel wieħed li jifhem l-istess ilsien tiegħu, u hekk jiftiehem aħjar. Il-kundizzjoni li dan l-uffiċjal magħżul kellu jkun jaf il-Malti, kienet biċ-ċajt.
Mhux biss għażlu minn pajjiżiu, imma għażlu wkoll mill-istess partit tiegħu. Kieku dan kien x’imkien ieħor, jgħidu li hu nepotiżmu. Li tfisser li taħseb għal xawwatek jgħid il-Malti.
Mhux eżempju tajjeb mill-Unjoni Ewropea, li tippriedka ħafna fuq il-korrettezza, imma mbagħad tidneb u bil-goff.
Ma hemmx għalfejn wieħed imur lura sa Jacques Santer għall-eżempji, li kellhom jirriżenjaw kollha minħabba l-korruzzjoni li kien hemm fil-kummissjoni. Ma waqfitx hemm l-istorja. Verheugen, dak li kien jiġi hawn jordnalna, lil ġbintu għollihom minn tarġa għall-oħra, u laħħaqhom fil-għoli fost l-impjegati. Kulħadd kien jaf x’mertu kellha din l-impjegata u kemm kienet taqdi … lill-kummissjoni u għalhekk liċ-ċittadini tal-Ewropa li jħallsu.
Bħala pajjiż għandna nosservaw il-Kostituzzjoni tagħna, rikonoxxuta mill-Unjoni Ewropea u mill-Qorti tal-Ġustizzja. Il-Malti huwa l-ilsien, jekk nafu nitkellmu u nifhmu ilsna oħra, aħjar, imma dejjem jibqa’ l-Malti l-ilsien li jagħżilna minn oħrajn.
Nittama li ma noqgħodux ċiċċi kwieti ħalli jagħtuna santa! U tgħaddi tagħhom u ma jimpurtax?
TAGĦTI KONT.
Naqra kummenti u artikli fejn ikun hemm mistoqsijiet dwar affarijiet f’ministeru, jew dipartiment, li jeħtieġu tweġiba. Ikun hemm insistenza u repetizzjoni tal-insistenza ħalli din l-informazzjoni tingħata.
Ikun hemm min jgħid, “mhux affari tagħhom! B’liema dritt ikunu jafu?”
Id-dritt mhux tal-ġurnalisti biss, imma tiegħi u tiegħek ukoll. Jekk jien nara li xi ħadd qed ikaxkar riġlejh biex jikxef il-karti, basta mhux kwestjoni ta’ sigurtà nazzjonali, jew informazzjoni personali, ma niħux gost. Ma togħġobnix. Bosta drabi dawk il-mistoqsijiet isiru wara li jkun hemm xi ċittadin li jwassal l-informazzjoni u allura tibda l-istorja.
Kif nista’ jien niddefendi lil xi ħadd bil-kitba jew bil-kelma tiegħi, jekk l-anqas jien ma jkolli l-informazzjoni. Ħabib tiegħi, l-Avukat Chris Cilia kiteb fuq facebook li jaf li bandli f’raħal ġew jiswew €15,000 u f’raħal ieħor (mhux indurati bid-deheb) ġew jiswew €200,000. Xi ħadd għandu jagħti spjegazzjoni.
Min jaħseb li n-nies jinsew, għandu żball. Tistkanta kemm jiftakru u jfakkru, espressjonijiet li jkunu ħarġu mill-fomm, żmien ilu. U jkun hemm min jiddarras, meta jkun hemm rakkonti u stejjer li aħjar wieħed jweġibhom mal-ewwel u bla tlaqliq jew tidwir.
Min għandu jedd għal din l-informazzjoni? Huma ċ-ċittadini li jkunu tellgħu lill-membri tal-parlament, u fosthom ikun hemm min sar Ministru. Meta nitkellmu fuq “accountability” tfisser li dak li jkun irid jagħti kont ta’ kif mexa, kif nefaq u għala nefaq. Il-kelma mill-Ingliż qalbuha għall-Malti f’mod stramb” akkontabilità” meta għandna l-esprezzjoni “tagħti kont”.
Kull uffiċjal pubbliku, u hawn ifisser ukoll dawk kollha li huma f’xi awtorità pubblika, kumpanija, aġenzija eċċ eċċ eċċ tal-gvern, għandhom obbligu li juru li huma prokuraturi taċ-ċittadini u għandhom jagħtu rendikont liċ-ċittadini, huma ta’ liema lewn politiku huma. Kieku qed jonfqu u jħallsu xi ħaġa minn buthom, hemm affari tagħhom, imma fejn jidħlu l-interessi tal-poplu, hemm qed jamministraw u mhux dak li ħallilhom in-nannu fil-wirt.
Jekk min qed jamministra, anke jekk ikun f’każin tal-banda, jiġi jaqa’ u jqum mill-mistoqsijiet tal-membri, hemm ikun qed juri arroganza, u jistieden li mal-ewwel laqgħa ġenerali jqaċċtuh.
L-arroganza ġġibek tara n-nies dubbien, u d-dubbien idur għalik
