Il-Prim Ministru u Mexxej tal-Partit Laburista Robert Abela qal li bir-riforma biex tissaħħaħ is-sigurtà fit-toroq, kulħadd se jkun jaf il-konsegwenzi jekk jirrikorri għal sewqan abbużiv, hekk kif is-sewwieqa ser jaħsbuha darbtejn qabel isuqu taħt l-effett tal-alkoħol u d-droga.
F’intervista mal-preżentatur Ronald Vassallo, Dr Abela qal li fost il-proposti tal-Gvern, u wara konsultazzjoni mal-istakeholders, il-Pulizija se jkunu jistgħu jużaw tagħmir apposta li jittestja persuni fuq suspett li jkunu qed isuqu taħt l-inflwenza tad-droga (għax s’issa l-ittestjar jista’ jsir biss għal min ikun taħt l-influwenza tal-alkoħol) biex iservu ta’ provi fil-Qorti.
Semma’ wkoll li qed ikun propost is-sospensjoni tal-liċenzja ta’ persuni li jkunu qed jiffaċċjaw akkużi li korrimment jew fatalitajiet fit-toroq, kif ukoll piena ta’ ħabs effettiva għal min jinstab ħati ta’ fatalità minħabba sewqan taħt l-influwenza tad-droga jew l-alkoħol. Ma’ dawn żied ukoll li se jiħraxu l-pieni u se jiżdied l-infurzar għal iktar dixxiplina fit-toroq.
Mistoqsi dwar ir-riforma fl-ippjanar, Dr Abela wieġeb li kien hemm sottomissjonijiet interessanti waqt il-proċess ta’ konsultazzjoni pubblika li jagħlaq bħal-lum ġimgħa. Qal li din il-ġimgħa sejjaħ il-Youth Advisory Forum li matulu ż-żgħażagħ ħarġu b’suġġerimenti kostruttivi, bħalma l-pubbliku ġenerali qed iressaq bosta ideat fosthom ta’ żvilupp sostenibbli.
Il-Prim Ministru xejjen l-ispekulazzjoni li din ir-riforma se tissanzjona kull forma ta’ illegalità. Qal li mhux kull applikazzjoni għal sanzjoni jew regolarizzazzjoni se tiġi aċċettata għax trid tissodisfa l-kriterji stabbiliti mill-Awtorità tal-Ippjanar li mhux se tippermetti sfreġju ambjentali. Ikkonferma wkoll li l-proċess tal-applikazzjoni kif inhu bħalissa se jibqa’ fis-seħħ għall-iżvilupp ġdid.
Riforma internazzjonali fit-taxxa għall-kumpaniji kbar
Dr Abela ħabbar li b’deċiżjoni tal-Kabinett se titressaq liġi biex kumpaniji multinazzjonali li joperaw f’Malta jibdew iħallsu rata ta’ taxxa ta’ 15% flok 5% bħala parti minn riforma internazzjonali magħrufa bħala global minimum tax rate.
Il-Prim Ministru qal li b’din ir-riforma Malta se tkun qed tiġbor it-taxxa minn kumpaniji li għandhom turnover ta’ iktar minn €750 miljun fis-sena b’rata ta’ 15%, flok titħallas 5% f’pajjiżna u l-10% oħra fil-pajjiż li minnu tkun oriġinat il-kumpanija.
Spjega li b’hekk Malta se jkollha dħul ġdid li bis-saħħa tiegħu l-Gvern se jkompli jqassam il-ġid li jinħoloq fejn hemm bżonn l-iktar. Qal li bit-tkabbir ekonomiku robust li qed jirreġistra pajjiżna, kuntrarju ta’ pajjiżi oħrajn Ewropej, fil-Budget li jmiss se jkun hemm miżuri ġodda, u oħrajn li saru diġà li se jissaħħu biex jindirizzaw il-ħtiġijiet tal-familji u n-negozji.
L-aqwa budget li qatt ra pajjiżna
Dr Abela qal li l-budget se jkun qed jagħti prijorità lill-edukazzjoni, is-saħħa u l-qasam soċjali, li huma t-tliet pilastri ewlenin tal-Gvern, u tenna li se jkun qed ikompli jsostni lill-familji u n-negozji bis-sussidji fil-kontijiet tad-dawl u l-ilma u l-fjuwils. Dan b’kuntrast ta’ dak li qed jiġri f’ekonomiji kbar bħal Franza u l-Ġermanja bħalissa, li għaddejjin minn diffikultajiet biex isostnu l-benefiċċji soċjali fost affarijiet oħra, mentri l-ekonomija Maltija kompliet tikber id-doppju tat-tkabbir irreġistrat fl-Unjoni Ewropea.
Il-Prim Ministru qal li ħadd ma jrid imur lura għal żmien Gvern Nazzjonalista ta’ qabel l-2013 meta kien hawn qgħad, ħaddiema fuq 4-day week, pensjonijiet friżati u COLA ma tingħatax sħiħa lill-pensjonanti fost affarijiet oħra. Spjega li Gvern Laburista qed jiffoka l-ħidma tiegħu biex ikun hawn impjiegi value-added u tisħiħ fl-infrastruttura tal-pajjiż, żewġ fatturi li jinkwadraw fil-Viżjoni Malta 2050.
Dwar il-finanzjament tal-partiti, Dr Abela qal li kap responsabbli ta’ partit politiku jrid jara li l-partit tiegħu jżomm il-finanzi tiegħu b’mod sostenibbli mhux kif irid il-Partit Nazzjonalista jieħdu bailout mit-taxxi tal-poplu. Mistoqsi dwar it-tmexxija ġdida tal-PN, il-Prim Ministru qal li l-estremisti se jibqgħu jmexxu lill-Partit Nazzjonalista u dan ma jawgura xejn tajjeb lill-Oppożizzjoni li qed taħli l-enerġija fuq kemm tbiddel kapijiet.
Dr Abela temm jgħid li l-Gvern huwa ffukat fuq kif se jkompli jimxi fil-progress soċjali u kif se jtejjeb il-qagħda tal-familji, l-istudenti, l-anzjani, iż-żgħażagħ u n-negozji, fosthom bl-aqwa budget li qatt se jkollu l-pajjiż.