Birkirkara……………..2
Marsaxlokk……………0
Wara nuqqas ta’ tmien snin, Birkirkara rebħu l-IZIBET FA Trophy għas-sitt darba fl-istorja tagħhom meta għelbu lil Marsaxlokk bl-iskor ta’ 2-0, biż-żewġ goals għalihom jaslu tard fil-partita f’temp ta’ seba’ minuti fit-tieni taqsima.
Madankollu, ta’ min wieħed jirrimarka li Marsaxlokk offrew oppożizzjoni denja lill-Istripes tul id-90 minuta, iżda, fl-aħħar mill-aħħar l-esperjenza wiesa’ li jippossjedu l-players ta’ Birkirkara għamlet id-differenza kollha.
Kienu Marasaxlokk li ħarġu fuq l-offenisva u wara biss żewġ minuti Tiago Adan Fonseca kellu xutt minn pożizzjoni ideali mxellef f’corner minn difensur avversarju.
Birkirkara wieġbu man-nofsiegħa loghob meta l-captain Yannick Yankam kellu xutt kemmxejn fraġli salvat minn mal-art mill-goalkeeper ta’ Marsaxlokk Marko Drobnjak, mgħejjun minn difensur tat-team tiegħu.
Huma komplew fuq l-offensiva u żewġ minuti biss wara Alex Da Paixao Alves għadda tajjeb lejn Osvaldo Iorio li min-naħa tiegħu xeħet cross lejn Enzo Daniel Cabrera li ttanta xortih permezz ta’ konklużjoni akrobatika iżda ma rnexxilux jagħmel kuntatt mal-ballun.
Fil-ftuħ tat-tieni taqsima, Birkirkara komplew fejn ħallew fl-ewwel waħda u fit-48 minuta, Osvaldo Iorio, venven xutt b’saħħtu minn barra l-kaxxa li iżda ntemm barra.
Huma komplew jippressaw u fl-54 minuta Alex Da Paixao Alves dar tajjeb ma’ player avversarju qabel spara xutt minn barra l-kaxxa li ntemm ftit għoli.
Ħames minuti wara, Paul Mbong, indirizza cross li sab lil Enzo Daniel Cabrera li kellu d-daqqa ta’ ras tiegħu tintemm ftit għoli.
Kulma jmur kompla d-dominju assolut tal-Istripes u minuta biss wara, Alex Da Paiaxo Alves għadda tajjeb lejn Enzo Daniel Cabrera li kellu x-xutt tiegħu minn barra l-kaxxa jintemm barra.
Marsaxlokk ħolqu azzjoni remota ta’ skor fid-69 minuta meta Ayrton Attard kellu xutt mid-distanza li ntemm ftit barra.
Birkirkara fetħu l-iskor fit-78 minuta meta xutt minn ġol-kaxxa ta’ Cain Attard tkompla għal ġewwa minn OSVALDO IORIO biex tefa’ lill-partitarji numerużi tal-Istripes f’delirju ta’ ferħ, b’dan ikun it-tieni goal għalih f’din l-edizzjoni tal-IZIBET FA Trophy.
Huma komplew jagħfsu u fit-82 minuta, freekick ta’ Alex da Paixao Alves, li kellu partita mill-aqwa, għadda ftit għoli.
Tliet minuti wara l-Istripes issiġillaw ir-rebħa permezz tat-tieni goal meta Osvaldo Iorio xeħet pass fid-direzzjoni ta’ Enzo Daniel Cabrera iżda Claudio Bonanni fit-tentattiv li jikklerja l-ballun ‘il bogħod minn kull periklu, tefa’ l-ballun fil-lasta tiegħu stess, biex b’hekk irriżulta auto-goal sfortunat.
Birkirkara: 19-Amara Sylla, 2-Osvaldo Iorio, 6-Diego Pires Dall’Oca, 7-Alex Da Paixao Alves (92-Kevin Tulimieri 88), 8-Yannick Yankam (25-Neil Micallef 91), 10-Paul Mbong (99-Andrei Ciolacu 70), 11-Kurt Zammit, 22-Cain Attard, 30-Enzo Daniel Cabrera (23-Jean Paul Farrugia 91), 42-Simon Zibo, 77-Denis Custodio Ribeiro Coach: Giovanni Tedecso
Marsaxalokk: 95-Marko Drobnjak, 7-Ayrton Attard, 17-Peter Xuereb (5-Christopher Edafe Uzeh 59), 21-Adrian Santiago Ferraris, 24-Juan Cruz Aguilar, 25-Oscar Carniello (8-Terence Vella 81), 27-Leandro Aguirre, 30-Ryan Scicluna (13-Claudio Bonanni 81), 37-Fabian Santiago Moracci (9-Kristian Keqi 59), 88-Dejan Vukovic, 99-Tiago Adan Fonseca Coach: Pablo Doffo
Referee: Trustin Farrugia Cann
Ass. Referees: Luke Portelli, Edward Spiteri
Raba’ Uffiċjal: Emanuel Grech
Skorers: O. Iorio 78, C. Bonanni og 85 (B)
Ammoniti: R. Scicluna, T. A. Fonseca, L. Aguirre (M), Y. Yankam (B)
