Valletta Breakwater kisbu żewġ rebħiet importanti fin-National League organizzat mill-Malta Blackball Federation sabiex telgħu fl-ewwel post tal-klassifika.
Il-Beltin għelbu lil Jojo’s Birżebbuġa 11-7 u l-isfida diretta kontra Cospicua Rangers 11-6 sabiex saħansitra qabżu anke lil Ħamrun 147 A li ma kinux fl-azzjoni matul din il-ġimgħa.
Sadanittant, Cospicua Rangers irritornaw għar-rebħ wara li għelbu lil Ħamrun 147 B 11-6 filwaqt li f’logħba ferm bilanċjata, Każin Pinto Qormi A u Jojo’s Birżebbuġa A temmew il-konfront tagħhom fi draw ta’ 10-10.
Fir-Regional League, ikompli d-dwell bejn Mosta St Mary’s A u Birkirkara Youngsters li t-tnejn li huma rebħu l-konfront rispettiv tagħhom.
Il-Mostin rebħu 11-6 kontra San Ġwann White Hart filwaqt li l-Karkariżi għelbu 11-7 lil Każin Pinto Qormi B.
San Ġwann White Hart saħħew it-tielet post wara li xxalaw kontra Birkirkara Boċċi tant li rebħu 11-0. Bl-istess skor Birkirkara Duke’s A rebħu d-derby kontra Juve Birkirkara A.
Min-naħa l-oħra, Selmun Bar A kisbu rebħa importanti ta’ 11-8 kontra Ħamrun 147 C sabiex issa jinsabu biss punt bogħod mill-avversarji tagħhom fil-klassifika.
Fi grupp A tal-Community League, Valletta Fossa Boys komplew bil-mument pożittiv tagħhom wara li kisbu żewġ rebħiet ta’ 11-2 u 11-7 kontra Domus Kids Żejtun u Birkirkara Duke’s B rispettivament. It-tim fit-tieni post, Juve Birkirkara B kellhom riżultati mħallta hekk kif wara li tilfu 11-6 kontra Birkirkara Duke’s B, rebħu faċilment lil Jojo’s Birżebbuġa B 11-0.
Fi grupp B, PL Balzan B jinsabu fil-quċċata bi 33 punt hekk kif rebħu lil Taċ-Ċaċċu Qormi 11-3 u Ħamrun 147 D 11-6. L-istess Ħamruniżi kellhom is-sodisfazzjon li jirbħu lil San Ġwann Nick’s B 11-4. Selmun Bar B qed isegwu hekk kif kisbu rebħa ta’ 11-8 kontra San Ġwann Nick’s B u draw ta’ 10-10 kontra Mosta St Mary’s C.
KLASSIFIKA – NATIONAL LEAGUE
Valletta Breakwater 24, Ħamrun 147 A 22, Cospicua Rangers19, Ħamrun 147 B 18, Jojo’s Birżebbuġa A 4, Każin Pinto A 1
KLASSIFIKA – REGIONAL LEAGUE:
Mosta St Mary’s A 44,Birkirkara Youngsters 43, San Ġwann Nick’s A 37, Birkirkara Duke’s A 35, Ħamrun 147 C 26, Selmun Bar A 25, Birkirkara Boċċi 24, Każin Pinto Qormi B 19, San Ġwann White Hart 6, Juve Birkirkara A 3.
KLASSIFIKA – COMMUNITY LEAGUE – Grupp A
Valletta Fossa Boys 34 , Juve Birkirkara B 31, Birkirkara Duke’s B 24, Domus Kids Żejtun 22, Jojo’s Birżebbuġa B 18, Selmun Bar C 13, Mosta St Mary’s B 12, PL Balzan 3
KLASSIFIKA COMMUNITY LEAGUE – Grupp B
PL Balzan B 33, Ħamrun 147 D 30, Selmun Bar B 23, PN Mġarr 18, Mosta St Mary’s C 17, Taċ-Ċaċċu Qormi 15, San Ġwann Nick’s B 11, Di Santos Qormi 9.
