Tal-Għaqda Repubblika, nhar l-Erbgħa li għadda niżżlu fi Triq ir-Repubblika, il-Belt Valletta, ftit għexieren ta’ nies biex jipprotestaw kontra d-dħul tar-riforma fil-liġi tal-inkjesti maġisterjali u biex ukoll jagħmlu pressjoni fuq il-membri parlamentari biex dan l-abbozz ma jgħaddix.
Dan ukoll ma kienx sorpriża li l-protesta saret fil-jum li fih ittieħdet il-votazzjoni fil-Parlament dwar il-liġi. Lanqas ma kienet sorpriża li flok il-Partit Nazzjonalista, li jiddelitta ħafna bil-protesti u billi jniżżel in-nies fit-toroq, il-protesta saret mill-għaqda Repubblika.
Madanakollu, il-vot fil-Parlament ġie approvat u fisser li l-protesta ta’ nhar l-Erbgħa ma swiet għal xejn. Anke jekk kien hemm min ġarr miegħu borom, twaġen, għotji u sfafar biex mingħalihom iqanqlu xi ftit tal-istorbju.
Minflok ma jħarsu ‘l quddiem, dawn qed jerġgħu jmorru lura lejn is-snin tad-dlam meta l-protesti kienu jsiru bil-kuċċaruni u l-bramel. Imma l-poplu dawn l-affarijiet ma jridhomx u jistmerrhom. Il-poplu jrid politikanti serji li jipprotestaw jew jikkritikaw biex dak li jsir, isir aħjar u mhux għax motivati minn partiġġjaniżmu sfrenat. Il-poplu lanqas ma jrid jisma’ għajjat u tgħajjir dispreġġjattiv sempliċiment għax min jipprotesta ma jkunx qed jaqbel ma’ liġi jew ħaġa oħra.
Għalhekk ikun aħjar li kemm il-Partit Nazzjonalista u anke tal-Għaqda Repubblika jieħdu l-parir tad-Deputat Nazzjonalista Alex Borg u jibdew jifhmu li l-politika hija professjoni utli u neċessarja u jekk issir b’mod tajjeb għandha tkun forza pożittiva għall-ġid fis-soċjetà u l-komunità.
Għandhom jagħrfu wkoll li l-politika li ssir tajjeb għandha taspira tama u fiduċja u tistimula ġenerazzjoni ġdida ta’ politiċi li ma jkunx moħħhom fit-taħbit tal-borom, l-għotjien u l-abbandun ta’ seduti parlamentari jew partijiet minnhom.
Filwaqt li aħna naqblu li jsiru protesti u dimostrazzjonijiet, għax huma mezz ta’ kif jiġi espress is-sentiment tan-nies, b’danakollu nemmnu li biex tipprotesta la għandek għalfejn tagħmel storbju u anqas tgħajjar. Għaliex b’hekk ma tkun qed tilħaq l-ebda skop ħlief li taħli l-ħin u tiġbed fuqek l-antipatija ta’ min ikun qed jara dawk ix-xenati.
