Era ġdida bdiet għar-Renju Unit wara li ġie fis-seħħ b’mod formali s-separazzjoni tagħha mill-Unjoni Ewropea.
Ir-Renju Unit waqfet issegwi r-regoli tal-UE fil-23:00 GMT, hekk kif regoli ġodda għall-ivvjaġġar, kummerċ, immigrazzjoni u koperazzjoni dwar is-sigurtà daħlu fis-seħħ.
Il-Prim Ministru Brittaniku Boris Johnson qal li r-Renju Unit għandha “l-libertà f’idejha”, b’dan jippermettilha biex tagħmel affarijiet “b’mod differenti u aħjar” issa li l-proċess twil ta’ Brexit ġie fi tmiemu.
L-ewwel trakkijiet tal-merkanzija li kienu qed jaslu mal-fruntiera intant daħlu fir-Renju Unit mingħajr dewmien.
Ministru Brittaniċi wissew li fil-jiem u l-ġimgħat li ġejjin jafu jinqalgħu xi ntoppi, hekk kif ir-regoli l-ġodda jidħlu fis-seħħ u jindraw, speċjalment mil-lat ta’ kummerċ.
Madankollu uffiċjali insistew li s-sistemi l-ġodda tal-kontrolli mal-fruntiera diġà bdew jaħdmu.
Wara li tlestew l-ewwel kontrolli tad-Dwana, il-kelliemi għall-Eurotunnel John Keefe qal li kollox mexa kif ippjanat.
L-ewwel vapur bi trakkijiet tal-merkanzija minn Wales wasal f’Dublin fil-05:55 GMT b’abbord ikun hemm madwar għaxar trakkijiet, li lkoll lestew il-proċedura tal-kontrolli tad-Dwana mingħajr dewmien.
Ir-Renju Unit uffiċjalment ħalla l-blokk Ewropew fil-31 ta’ Jannar, tliet sjin u nofs wara li l-poplu Brittaniku kien ivvota kontra s-sħubija fl-UE fir-referendum ta’ Brexit fl-2016.
Madankollu għal dawn l-aħħar 11-il xahar baqgħet tosserva r-regoli ta’ kummerċ tal-Unjoni Ewropea waqt li ż-żewġ naħar komplew jinnegozjaw dwar ir-relazzjoni ekonomika futura.
