Brian Cini fil-k/finali tal-Kampjonat tad-Dinja tas-snooker

Waqt il-Kampjonat tad-Dinja tas-Snooker tal-Amateurs li qed isiru f’Saïdia, l-Marokk, Brian Cini fi spażju ta’ 10 siegħat lagħab darbtejn u ħareġ rebbieħ fiż-żewġ konfronti biex issa avanza mal-aħħar tmienja għal kwarti finali.

Filgħodu l-avversarju tiegħu f’logħba mill-fażi tal-aħħar 32 kien iż-żgħażugħ Ingliż ta’ 20 sena, Aidan Murphy. Il-Malti fetaħ tajjeb u rebaħ l-ewwel frame iżda Murphy irrisponda bi break u clearance ta’ 91 punt u mill-ewwel ġab il-parita’. Mit-tielet frame ‘il quddiem Brian Cini reġa ħa l-kontroll assolut tal-logħba u rebaħ it-tliet frames suċċesivi biex għalaq il-konfront bil-punteġġ ta’ 4-1, bl-iskors ta’ kull frames ikunu; 57-43, 19-107, 66-38, 67-42 u 88-75.

Filgħaxija fir-rawnd tal-aħħar 16, Cini lagħab kontra plejer Ingliż ieħor, din id-darba Daniel Womersley li għandu 33 sena. Cini ma setax ikollu bidu aħjar meta rebaħ l-ewwel żewġ frames filwaqt li fl-ewwel frame anke’ wettaq break u clearance ta’ 100 punt. Womersley reġa daħal sew fil-logħba wara li rebaħ it-tielet u r-raba’ frame biex ġab il-konfront parzjalment fi draw ta’ 2-2. Fil-bidu tal-ħames frame l-Ingliż rega’ beda tajjeb u fl-ewwel kolpi bena vantaġġ ta’ bi break ta’ 42 punt iżda Cini irreżiżta u irrisponda sew u b’mini break ta’ 13 u ieħor ta’ 62 punt dawwar dan il-frame favurih. Fis-sitt frame Cini reġa kien superjuri biex għalaq il-logħba bi skor finali ta’ 4-2, bil-punteggi tal-frames ikunu dawn; 105-13, 67-28, 27-59, 35-61, 75-42 u 71-33.

Il-Gimgħa, fil-jum ta’ qabel li jispiċċa dan il-kampjonat ser isiru l-kwarti finali, filgħodu u s-semi finali, wara nofs in-nhar.

L-avversarju ta’ Brian Cini fil-kwarti finali issa ser ikun il-Ġermaniż, Umit Dikme li kien elimina lil Aaron Busuttil fir-rawnd tal-aħħar 64. Din il-fażi terġa tintlagħab l-aħjar minn seba’ frames u l-logħba tibda fl-10 a.m.

Il-programm komplet tal-erba’ kwarti finali huwa dan: