Il-Royal Malta Yacht Club ospitat l-RMYC Spring Regatta fil-jien li għaddew, bi tliet tlielaq li saru s-Sibt, il-Ħadd u t-Tlieta.
Flotta ta’ 15-il dgħajsa kkompetiet fil-Klassijiet IRC u RMYC Club Rating, bir-regatta ssir taħt id-direzzjoni tal-Uffiċjal tat-Tellieqa Martin Azzopardi.
Ir-regatta żvolġiet f’kundizzjonijiet konsistentement diffiċli, fejn il-ekwipaġġi kellhom jissieltu ma’riħ qawwi u xi drabi estrem. L-ewwel tellieqa saret f’riħ qawwi mill-majjistral ta’ bejn 25 u 30 mil nawtiku fis-siegħa. Il-kundizzjonijiet baqgħu impenjattivi fit-tieni tellieqa, b’riħ ta’ bejn 10 u 15 mil nawtiku fis-siegħa madwar Kemmuna. L-aħħar tellieqa kienet l-aktar waħda severa, b’riħ qawwi ħafna u imbatt qawwi, fejn xi dgħajjes irreġistraw buffuri ta’madwar 52 mil nawtiku fis-siegħa.
Klassifikazzjoni IRC
Calypso (Sebastian Ripard) ippreżentat prestazzjoni perfetta, fejn rebħet it-tliet tlielaq (1-1-1) u kisbet total ta’ 3 punti.
“Dawn kienu ftit jiem sbieħ ta’ tlielaq fejn ħassejna li kien aktar bħax-xitwa milli r-rebbiegħa! Konna kuntenti li kellna prova tajba f’riħ qawwi t-Tlieta, b’rwiefen ta’ iktar minn 40 mil nawtiku fis-siegħa — malajr tinduna fejn hemm xi dgħufijiet! B’mod ġenerali, kienu jiem tajbin ta’ tlielaq, varjetà sabiħa ta’ kundizzjonijiet u fuq kollox kuntenti li konna fuq il-baħar!” – Sebastian Ripard, skipper ta’ Calypso.
Il-ġlieda għall-podju baqgħet sejra sal-aħħar tellieqa. Vivace (Andrew Agius Delicata / Matthew Gabriele) spiċċat fit-tieni post, segwita minn Pippus (David Anastasi) fit-tielet post, filwaqt li Ton Ton (Jonathan Gambin) kważi rebħet post fuq fil-podju wara serje kompetittiva fejn riżultati fuq ħin korrett kien deċiżiv.
Klassifikazzjoni RMYC Club Rating
Forever25 (Martin Kunath) ippreżentat serje konsistenti biex kisbet ir-rebħa ġenerali.
“It-tlielaq bil-Forever 25 tagħna kienu esperjenza intensiva iżda tassew sabiħa. Riħ qawwi u xi ħsarat fid-dgħajsa ġagħluna nagħtu kollox, iżda bħala ekwipaġġ ħadna gost ħafna u gawdejna bis-sħiħ il-kundizzjonijiet fuq il-baħar madwar Malta. Nixtiequ wkoll nirringrazzjaw lill-Club talli ospita din it-tellieqa.” – Alexandra Kunath, co-skipper ta’ Forever25
Otra Vez (Aaron Gatt Floridia) kienet bla dubju forza dominanti fuq il-baħar, b’żewġ rebħiet fit-tlielaq, iżda n-nuqqas ta’ parteċipazzjoni fl-ewwel tellieqa affettwa r-riżultat overall tagħha, u spiċċat fit-tieni post.
Il-premjijiet ingħataw fil-Royal Malta Yacht Club, b’attendenza ta’ ekwipaġġi, membri u mistiedna.
L-avveniment li jmiss fil-kalendarju tal-Club se jsir is-Sibt 11 ta’ April — it-tellieqa International Yacht Paint Fully Crewed Figure of 8.