Carlo Ancelotti bħalissa qed jipprepara għat-tielet staġun tat-tieni kariga tiegħu bħala l-coach ewlieni ta’ Real Madrid, li x’aktarx ikun ukoll l-aħħar tiegħu, wara spekulazzjonijiet li aċċetta li jieħu f’idejh ir-rowl ta’ coach tal-Brażil fis-sajf tas-sena d-dieħla.
Għalissa, l-attenzjoni sħiħa ta’ Ancelotti se tkun fuq l-istaġun li ġej ma’ Real Madrid, għalkemm ftit mill-attenzjoni tiegħu se jkollha tinqasam lejn inċident li seħħ waqt l-ewwel kariga tiegħu fit-tmexxija ma’ Los Blancos.
Kif ġie rrappurtat mill-media Taljana, Ancelotti ġie akkużat li ffroda lit-Teżor Spanjol is-somma ta’ €386,361 lura fl-2014. Il-fondi huma relatati mad-drittijiet tal-immaġni tiegħu dak iż-żmien.
L-Imħallef fil-każ tiegħu kkonkluda li Ancelotti ħeba dawn il-flus, u għalhekk il-każ se jgħaddi ġuri, għalkemm għadu mhux magħruf meta t-Taljan ikollu jkun preżenti fil-qorti.
Iżda hemm aħbar tajba għal Ancelotti, peress li huwa tneħħa minn akkuża simili fil-2015. Xorta waħda, il-coach ewlieni Madrilen f’xi ħin ikollu jittratta l-kwistjoni, li hija ‘l bogħod minn ideali.
