Il-Ministeru għal Għawdex u l-Ippjanar, għal sena oħra, qed jerġa’ jorganizza l-Gozo Arts Weekend, li se jittella’ bejn l-24 u s-26 ta’ Jannar 2025 f’diversi postijiet madwar il-gżira. Din is-sena, l-attenzjoni ser iddur fuq l-artist u l-iskultur rinomat Għawdxi, Michael Camilleri Cauchi.
Il-Ministru għal Għawdex u l-Ippjanar, Clint Camilleri, stqarr li: “Matul il-Gozo Arts Weekend il-pubbliku lokali u internazzjonali jista’ jgawdi programm varjat b’rabta max-xogħlijiet ta’ Camilleri Cauchi, artist li m’għandu bżonn l-ebda introduzzjoni. L-edizzjoni ta’ din is-sena se tlaqqagħna mat-talenti ta’ Camilleri Cauchi, fejn permezz tal-iskultura, ipaxxi l-għajn u jwassal il-messaġġ.”
Il-Gozo Arts Weekend għandu l-għan li jkompli jsaħħaħ il-pożizzjoni ta’ Għawdex bħala destinazzjoni kulturali u turistika, u din is-sena, il-programm se jinkludi għadd ta’ attivitajiet u esibizzjonijiet li se joffru lill-viżitaturi opportunità unika biex jiskopru u japprezzaw ix-xogħlijiet tal-iskultur Michael Camilleri Cauchi kif ukoll jiltaqgħu miegħu.
“Din iċ-ċelebrazzjoni tirrifletti l-impenn tagħna li nsaħħu l-arti bħala parti essenzjali mill-identità u mill-offerta turistika ta’ Għawdex. Nistiednu lil kulħadd jingħaqad magħna biex niċċelebraw it-talenti Għawdxin u l-lingwaġġ universali tal-arti,” temm jgħid il-Ministru Camilleri.
Għal aktar dettalji wieħed jista’ jżur https://eventsingozo.com/gozo-arts-weekend-2025/
