L-eks midfielder ta’ Arsenal, Barcelona u Chelsea, Cesc Fabregas (ritratt), ħabbar li rtira minnufih mill-football fl-eta’ ta’ 36 sena.
Huwa sejjaħ il-ħin tal-karriera li matulha rebaħ it-Tazza tad-Dinja ma’ Spanja, il-Premier League darbtejn ma’ Chelsea u La Liga ma’ Barcelona.
“Hija b’dieqa kbira li wasal iż-żmien li ndendel iż-żarbun tal-logħob tiegħi,” kiteb Fabregas fuq Instagram.
Huwa jtemm il-karriera tiegħu wara sena f’kuntratt ta’ sentejn mal-club Taljan tas-Serie B, Como.
Fabregas jgħid li issa se jgħaddi għal fuq il-bankina billi jikkowċja lit-timijiet ta’ riserva u taż-żgħażagħ ta’ Como.
“Madankollu mhux kollox dwejjaq, hekk kif issa se naqsam il-linja l-bajda u nibda nikkowċja lit-timijiet B u Primavera ta’ Como 1907,” żied jgħid. “Club u proġett li ma nistax inkun aktar eċċitati.
“Dan it-team ħelu tal-football rebaħ qalbi mill-ewwel minuta u ġie għandi fiż-żmien perfett tal-karriera tiegħi.
“Għalhekk wara 20 sena nkredibbli mimlija sagrifiċċji, dedikazzjoni u ferħ, wasal iż-żmien li ngħid grazzi u addio lil-logħba sabiħa. Ħabbejt kull minuta. Dan huwa proġett serju ħafna,” qal Fabregas fuq Como.
Fabregas ingħaqad mal-akkademja La Masia ta’ Barcelona ta’ 10 snin, fl-1997.
Wara li għadda mill-istruttura taż-żgħażagħ tal-ġganti ta’ La Liga, huwa lagħab 212-il partita fil-Premier League u rebaħ l-FA Cup ma’ Arsenal bejn l-2004 u l-2011 qabel ma mar lura f’Barcelona.
Wara tliet snin fin-Nou Camp, huwa rritorna fil-Premier League fl-2014 ma’ Chelsea, fejn lagħab ftit inqas minn 200 logħba.
Huwa għamel 68 dehra fi tliet snin u nofs ma’ Monaco, iżda l-ħin tal-logħob tiegħu kien limitat minħabba l-injuries, qabel ma mar jgħix f’Como.
Fabregas lagħab 110 darbiet għal Spanja u rebaħ ukoll il-Kampjonat Ewropew darbtejn, fl-2008 u fl-2012, kull naħa tal-ewwel Tazza tad-Dinja tal-pajjiż fl-Afrika t’Isfel.
“Mill-ewwel jiem tiegħi f’Barca, Arsenal u Barca mill-ġdid, Chelsea, Monaco u Como, se ngħożżhom kollha,” huwa kompla.
“Mill-irfiegħ tat-Tazza tad-Dinja, il-Ewro, għar-rebħ ta’ kollox fl-Ingilterra u Spanja u kważi t-trofej Ewropej kollha, kien vjaġġ li ma ninsa qatt.”
