Real Betis ……1
Chelsea ……….4
Chelsea saru r-raba’ team li rebaħ il-UEFA Conference League meta fil-Miejski Stadium fil-belt ta’ Wraclow, fil-Polonja, dawru telfa f’rebħa biex għelbu lil Real Betis bl-iskor ta’ 4-1 bil-goals tagħhom jaslu fit-tieni taqsima.
Real Betis ma setgħux kellhom bidu aħjar meta wara biss tmien minuti huma fetħu l-iskor meta Abde Ezzalzouli kkonkluda minn tarf il-kaxxa wara li rċieva mingħand Isco wara li d-difensur ta’ Chelsea, Malo Gusto, tilef il-pussess tal-ballun fi tliet kwarti ta’ ground.
Fl-24 minuta, l-Ispanjoli resqu viċin li jirduppjaw meta Ezzalzouli għadda lejn Johnny Cardoso iżda minn pożizzjoni ferm ideali falla l-mira.
Fit-tieni taqsima, Chelsea għamlu reazzjoni u fil-65 minuta kisbu d-draw minn daqqa ta’ ras ta’ Enzo Fernandez mill-cross ta’ Cole Palmer.
Ħames minuti wara, Palmer reġa’ kien il-protagonista meta dar mal-avversarju, Jesus Rodriguez, qabel dendel cross fejn Nicolas Jackson laħaq l-ewwel fuq il-ballun li ħabat ma’ sidru u għeleb lill-goalkeeper Adrian.
Fis-77 minuta minuta, Chelsea setgħu għalqu l- logħba iżda quddiem il-lasti Nicolas Jackson laqat il- ballun ħażin.
Iżda fit-83 minuta, Jadon Sancho żied ieħor minn pożizzjoni angolata filwaqt li fit-92 minuta, Moises Caicedo, issiġilla r-rebħa.