Chelsea qed jistennew li jitilfu lil Andreas Christensen bi free transfer dan is-sajf, wara li naqsu li jiftiehmu dwar kuntratt ġdid mad-difensur ċentrali.
L-internazzjonali tad-Danimarka kien player importanti għall-Blues matul l-istaġun 2021-22, fejn għamel 26 dehra fil-kompetizzjonijiet kollha, skorja żewġ goals u pprovda assist wieħed fil-proċess.
Madankollu, il-kuntratt ta’ Christensen fi Stamford Bridge għandu jiskadi fl-aħħar ta’ Ġunju, u ż-żewġ naħat ma setgħux jaslu għal ftehim dwar estensjoni tal-kuntratt.
Huwa mifhum li ċ-champions Ewropej u mondjali issa aċċettaw privatament li mhux se jkunu jistgħu jipprevjenu lid-difensur milli jħallihom bi free transfer.
Jidher li sħab il-player ta’ 25 sena ukoll qed jistennew li huwa jfittex club ġdid qabel l-istaġun 2022-23.
Barcelona u Bayern Munich huma maħsuba li qed jikkompetu għal Christensen, li għamel 153 dehra ma’ Chelsea fil-kompetizzjonijiet kollha minn meta ddebutta mal-Blues fl-2013.
