Il-birra Cisk Lager bi pjaċir qed tappoġġja l-Coast is Clear, il-kampanja ta’ tindif matul is-sena kollha, immexxija mill-ex plejer tal-waterpolo Mark Galea Pace.
Mark twieled u trabba Għawdex. Dejjem kien imdawwar bin-natura u l-baħar, u minn dejjem kien iħobb iqatta’ ħinu barra, jikkampja, it-trekking u l-canoeing. Meta ntebaħ bl-ammont ta’ tniġġis u skart mormi bl-addoċċ f’Malta, Mark iddeċieda li jaqbad u jibda jiġbor l-iskart u t-terrapien minn mal-kosta ta’ Malta, mill-art u bil-baħar. Bil-mod il-mod, l-attivitajiet ta’ tindif tiegħu minn żmien għal żmien inbidlu f’kampanja organizzata li bdiet tiġbed għadd ta’ voluntiera minn kull qasam tal-ħajja.
Dawn huma avvenimenti ta’ tindif b’differenza u għandhom xeħta aktar ta’ avventura; Mark jagħmel minn kollox biex fihom mhux biss jieħu gost hu imma wkoll jagħti pjaċir lill-voluntiera bil-mużika, bl-ikel u bix-xorb fi tmiem kull sessjoni.
“L-għan ewlieni tal-Coast is Clear hu li nnaddfu lil pajjiżna mill-ħmieġ mormi kif ġie ġie. Fl-istess ħin, it-tieni skop tagħna hu li nqajmu kuxjenza fil-mezzi soċjali u li niġbdu l-attenzjoni tan-nies billi nuruhom x’hemm hemm barra,” qal Mark Galea Pace. “Il-ġbir tal-flus u ta’ tim ta’ voluntiera biex intellgħu dawn l-avvenimenti jibqgħu sfida kontinwa.”
Mark jinsisti li hemm diversi modi kif nistgħu ngħinu l-ambjent: billi narmu l-iskart b’mod responsabbli, speċjalment meta nkunu barra; billi niġbru l-iskart; u billi nirrappurtaw l-iskart li naraw. “Jeħtieġ inkunu kburin b’pajjiżna u nagħmlu li nistgħu biex insebbħu l-ambjent ta’ madwarna għalina u għat-tfal tagħna.”
Is-Sur Steve Borg, Cisk Brand Executive, qal li “Aħna kburin li qed nagħtu l-appoġġ tagħna lill-Coast is Clear bil-marka ewlenija Cisk. Inħeġġu dejjem lill-klijenti biex jarmu l-iskart tagħhom b’mod responsabbli u issa qed ninkoraġġuhom ukoll jingħaqdu ma’ Mark f’dawn l-avvenimenti li jorganizza matul is-sena.”
Il-voluntiera mistiedna jingħaqdu ma’ Mark fix-xitwa bit-trakk jew fis-sajf bid-dgħajsa. Tista’ tikkuntattjah fuq il-paġni soċjali tal-Coast is Clear.
